სოზარი – ისევ ომბუდსმენად?! რა ვერსიას განიხილავს „ოცნება“?

ანი დვალიშვილი

საზოგადოება საპარლამენტო უმრავლესობიდან და ზოგადად, პარტიიდან სოზარ სუბარის, დიმიტრი ხუნდაძისა და მიხეილ ყაველაშვილის წასვლამაც გააოცა, თუმცა გასაოცარი არაფერია. შემოდგომაზე პარლამენტი ახალი სახალხო დამცველის არჩევის პროცედურებს დაიწყებს და როგორც გვეუბნებიან, „ოცნებას“ ძალიან სურს, ამ პოსტზე… სუბარი იხილოს. სოზარს გამოცდილება აქვს, ომბუდსმენი ნაციონალური მოძრაობის დროს იყო, მაგრამ რამდენად მისცემენ დასავლელი პარტნიორები ამის უფლებას, ძნელი სათქმელია. აი, თუ სუბარმა შემოდგომაზე დეპუტატის მანდატზე უარი თქვა (ეს ვერსიაც განიხილება), ის ლომჯარიას ადგილისთვის ბოლომდე იბრძოლებს. ომბუდსმენის არჩევას 90 დეპუტატის ხმა სჭირდება, რაც იმას ნიშნავს, რომ „ოცნებას“ მხოლოდ საკუთარი ძალები არ ეყოფა, თუმცა იმედს გამოთქვამენ, რომ სუბარის კანდიდატურას მხარს „გირჩიც“ დაუჭერს, „მოქალაქეებიც“ და პატრიოტთა ალიანსის სახელთ შესული დეპუტატებიც.

„ოპოზიციას არ უნდა აღიაროს, რომ ვადამდელი საპარლამენტო არჩევნები უტოპიაა. ხელისუფლებამ დღესვე რომ თქვას თანხმობა არჩევნების ვადამდე ჩატარებაზე, კანონის მიხედვით, ის მომავალი წლის მაისამდე არ გაიმართება. ეს კი იმას ნიშნავს, რომ ვადამდელი არჩევნები ოფიციალურ არჩევნებამდე, 1 წლით ადრე უნდა გაიმაართოს, რაც არც ლოგიკაში ჯდება და არც დასავლეთი დაუკრავს ტაშს. ახლა ოპოზიციის გამოსავალი მიტინგების გაწელვა და ხელისუფლების პროვოკაციაზე წამოგებაა, მაგრამ დროში გაწელილი მიტინგები, ყოველთვის ხელისუფლებაზე მუშაობს, რადგან მომიტინგეებს არც რესურსი ჰყოფნით და არც ნერვები“, – ეუბნება „ალიას“ „ოცნების“ მააღალჩინოსანი.

სამაგიეროდ, ოპოზიციის რამდენიმე ლიდერია მხნედ. მათ ზუსტად იციან, რომ ამ ეტაპზე ვადამდელი არჩევნების დანიშვნის შესაძლებლობა ნულს ქვემოთ არის, მაგრამ მათი გათვლით, ეს არ იციან იმ ახალგაზრდებმა, რომლებიც „ევროპა, ევროპას“ ძახილით რუსთაველი რამდენჯერმე გაავსეს. ამიტომ, იმედი სწორედ ამ ახალგაზრდებზეა, მათ ევროპის სახელით, ბოლომდე უნდა გააგრძელონ ბრძოლა და თუ ხელისუფლებას ნერვები უმტყუნებს და დარბევა მოხდება, ვადამდელი არჩევნები დღის წესრიგში ძალიან მარტივად დადგება.