საქართველოს კლინიკების ასოციაცია ქვეყანაში არსებულ მძიმე ეპიდვითარებას ეხმაურება და საქართველოს მთავრობას შემდეგი რეკომენდაციებით მიმართავს:
1) ჩაიკეტოს სახმელეთო საზღვრები ვიზიტორთათვის;
2) აეროპორტებში გამკაცრდეს და შეიზღუდოს ვიზიტორთა შემოსვლა;
3) ყალბი კოვიდპასპორტების კონტროლის მიზნით თითოეულ ვიზიტორს ლაბორატორიული კვლევებით განესაზღვროს ორგანიზმში მოცირკულირე ანტისხეულების რაოდენობრივი მაჩვენებელი;
4) პანდემიის მართვაში დაუყოვნებლივ ჩაერთოს თავდაცვის სამინისტრო;
5) გადაუდებლად დაიწყოს დიდი კლინიკების მიმდებარედ სამხედრო საველე ჰოსპიტლების მობილიზაცია;
6) გადაუდებლად შეიქმნას 3 კაციანი სამოქალაქო რაზმები გვარდიის შემადგენლობიდან, რომლებიც განახორციელებენ რეგულაციების აღსრულებაზე კონტროლს, როგორც საკურორტო ზონებში, აგრეთვე დიდ ქალაქებში, ცენტრალურ ქუჩებზე, გადასასვლელებზე, გაჩერებებზე, მეტროში და სხვა საზოგადოების თავშეყრის ადგილებზე;
7) გადაუდებლად დაიწყოს აცრები სოფლად, მობილური ჯგუფების მიერ, თანმიმდევრობით, ზონალური დაყოფის შესაბამისად, სპეციალურად გამოყოფილი რეანიმობილის დახმარებით.
8) მიმღებ განყოფილებებში განხორციელდეს ტრიაჟი:
– მძიმე პაციენტები მოთავსდნენ სტაციონარულ პირობებში;
– საშუალო სიმძიმის პაციენტები გადაყვანილიქნან სამხედრო საველე ჰოსპიტლებში;
– მსუბუქი მიმდინარეობის, მაგრამ საყურადღებო პაციენტები გადაყვანილ იქნან კოვიდსასტუმროებში.
9) სამხედრო საველო ჰოსპიტლების ბაზაზე სამოქალაქო სამედიცინო სექტორის მედპერსონალს დაეხმაროს სამხედრო ექიმები, სამხედრო მედდები, სანიტრები და სანინსტრუქტორები;
10) სამხედრო საველე ჰოსპიტლების მართვის საკითხებში ჩართვა ეთხოვოს აღნიშნულ საკითხებში მაღალი კვალიფიკაციის მქონე სამხედრო სამედიცინო სამსახურის პოლკოვნიკს ლაშა ქოიავას.
კომენტარები