განსაკუთრებულ დავალებათა დეპარტამენტის დირექტორის, ზვიად ხარაზიშვილის, “ხარებას” და ვიცე-გუბერნატორის, გიორგი შინჯიკაშვილის დაჯგუფებებს შორის მომხდარი დაპირისპირების შესახებ “პირველებისთვის” ახალი დეტალები ხდება ცნობილი.
ირკვევა, რომ ერთი დაჭრილის გარდა, არიან სასტიკად ნაცემებიც. შემთხვევა, 17 იანვარს, თბილისში მდებარე ერთ-ერთ სპორტდარბაზთან მოხდა. წყაროს ცნობით, სწორედ აქ მუშაობდა 33 წლის ჯონი მარიდაშვილი, რომელსაც ჩასაფრება მოუწყვეს და ცეცხლსასროლი იარაღიდან რამდენიმე ჭრილობა მიაყენეს.
ცნობისთვის, გუშინ “პირველმა” ოფიციალური დადასტურება მიიღო “ჰელსიკორიდან”, რომ ცეცხლსასროლი იარაღით დაჭრილი 33 წლის მამაკაცი მათ კლინიკაშია მოთავსებული.
რაც შეეხება ორ ნაცემ პირს, ფაქტს “პირველებს” იმ კორპუსის მაცხოვრებლები უდასტურებენ, სადაც სისხლიანი ანგარიშსწორება მოხდა. მათივე თქმით, გაიგეს რამდენიმე გასროლის ხმა. კორპუსის ჩატში კი დაიწერა ისიც, რომ “ხარებას” და “შინჯიკას” დაჯგუფებებს შორის დაპირისპირებისას სასტიკად სცემეს ორი პირი.
ადგილობრივი, რომელიც “პირველებმა” ჩაწერა, ამბობს იმასაც, რომ სროლის შედეგად ეზოში მდგარი ავტომობილიც დაზიანდა.
მისივე თქმით, ადგილზე პოლიცია არ უნახავთ, შესაბამისად გომელაურის უწყების თანამშრომლებს დანაშაულის ადგილზე საგამოძიებო ღონისძიებები არავის ჩაუტარებია.
დაჭრილი ჯონი მარიდაშვილი გიორგი უბილავას ახლო გარემოცვის წევრია. უბილავა კი თავის მხრივ შინჯიკაშვილის უახლეს გარემოცვას წარმოადგენს.
ვინ არის გიორგი უბილავა?
ის არის “ოცნების” ერთ-ერთი დასაყრდენი, ქვემო ქართლის გუბერნატორის, გიორგი შინჯიკაშვილის დაჯგუფების წევრია. მისი სახელი ბევრ საქმეში ფიგურირებს. გავრცელებული ინფორმაციით, ის იყო ერთ-ერთი თავდამსხმელი აქციის მშვიდობიან დემონსტრანტებზე, საუბარია აპრილის მოვლენებზე, როდესაც გმირთა მოედანზე შენიღბული პირები სასტიკად გაუსწორდნენ ახალგაზრდებს.
“პირველების” ინფორმაციით, მას შემდეგ რაც მარიდაშვილი დაჭრეს, უბილავამ ქვეყანა დატოვა.
როგორ დაიწყო “ხარებასა” და შინჯიკაშვილს შორის დაპირისპირება?
“შაბათის ეთერს” ინფორმირებული წყარო უყვება, რომ დიდი დაპირისპირება განსაკუთრებულ დავალებათა დეპარტამენტის დირექტორ “ხარებას” და ქვემო ქართლის გუბერნატორის მოადგილის დაჯგუფებებს შორის 10 ივნისს რესტორანში დაიწყო.
“შაბათის ეთერის” სკანდალური ჟურნალისტური გამოძიებით ირკვევა, რომ სპეცრაზმელების ელიტურ ქვედანაყოფსა და ვიცე გუბერნატორის გარემოცვას შორის დაპირისპირება რესტორანში დაიწყო, რაც შემდგომში საქმეს გარჩევასა და არაფორმალების ჩართვით, ფიზიკურ ანგარიშსწორებაში გადაიზარდა. საქმე იქამდეც მივიდა, რომ გაბრაზებული “ხარებას” შურისძიების შესაკავებლად გიორგი შინჯიკაშვილის მოკავშირეებმა მის სახლთან მორიგეობა დააწესესს და სოფლისკენ მიმავალი გზები ცოცხალი კედლით ჩაკეტეს.
“ხარება’ “შინჯიკას” ყურის მოჭრითაც კი ემუქრებოდა. მაშინ მაღალჩინოსანი ქვეყნდანაც კი წავიდა.
კომენტარები