“სიკვდილობის დიდი წილი მოდის პაციენტებზე, ვინც ბინაზე მკურნალობენ, ვისაც არ სჯეროდა კოვიდის და არ მიმართა ექიმს”

ინფექციური საავადმყოფოს დირექტორმა თენგიზ ცერცვაძემ ქვეყანაში არსებული ეპიდვითარება შეაფასა.

„არჩევნები ეპიდემიოლოგიური თვალსაზრისით უმაღლეს დონეზე ჩატარდა. ჯერჯერობით ჩვენი მთავრობა ასრულებს საზოგადოების დაკვეთას, რომელსაც „ლოქდაუნი“ არ უნდა. კლინიკურ მართვაში კარგ პარამეტრებს ვინარჩუნებთ და ეს დასაფასებელია. ჩვენზე უკეთესი მაჩვენებელი აქვს მხოლოდ ლიეტუვას და სლოვაკეთს.

მიღებულია ზომები, გაიზარდოს რესურსი ბინაზე სასწრაფო დახმარების მომსახურების, ოჯახის ექიმებისა და ონლაინ კლინიკების. მთავარი მაჩვენებელი თუ როგორ უმკლავდება ქვეყანა კოვიდ ინფექციას, არის მისი ადამიანური დანაკარგი, სიკვდილობის რაოდენობა. პანდემია რომ დამთავრდება, შემთხვევების რიცხვი დაგვავიწყდება, ყველას დაამახსოვრდება რამდენი ადამიანი დაკარგა ქვეყანამ.

სიკვდილობის შემთხვევების მნიშვნელოვანი რაოდენობა მოდის იმ პაციენტებზე, ვინც ბინაზე მკურნალობენ და არ მიაქციეს ყურადღება მიმდინარე კოვიდინფექციას, უკიდურესად დამძიმების შემდეგ მიმართეს ექიმს. ეს ის კატეგორიაა, ვისაც არ სჯეროდა კოვიდის არსებობის და არ მიმართა ექიმს.

ჩემი თხოვნა იქნება, რომ გამოიყენოთ მასმედიის უდიდესი გავლენა საზოგადოებაზე და ასეთმა ადამიანებმა, ვისაც სიმპტომები აღენიშნება მიმართონ ექიმს. გარკვეული რაოდენობა ადამიანების, განსაკუთრებულად კი ახალგაზრდები, დემონსტრაციულად ახდენენ კოვიდის და რეგულაციების იგნორირებას.

გთხოვთ გაითვალისწინეთ, ეს ყველაზე დიდი შეცდომაა. ბევრი მინახავს კოვიდინფიცირებული, სწორედ ამ კატეგორიის ადამიანებიდან“, – დასძინა თენგიზ ცერცვაძემ.

წყარო – დაიჯესტი