“სიღარიბე, ივანიშვილი, პოლიცია” – რატომ დააკავეს სტუდენტები?

თბილისის სახელმწიფო უნივერსიტეტის სტუდენტის, ლუკა ხიზაძის დაკავებასთან დაკავშირებით ახალი დეტალები ხდება ცნობილი – ახალგაზრდის უფლებადამცველის ცნობით, სტუდენტი 6 თებერვალს, ღამის 2 საათზე, ჭავჭავაძის გამზირზე დააპატიმრეს.

ადვოკატი მედიასთან ამბობს, რომ ლუკა ხიზაძეს პოლიციის კანონიერი მოთხოვნისადმი დაუმორჩილებლობას ედავებიან, თუმცა მისი ინტერესების დამცველი მიიჩნევს, რომ ბრალი აბსურდულია.

ადვოკატი განმარტავს, რომ ახალგაზრდას ხელში ივანიშვილის რეჟიმის საწინააღმდეგო ტრანსფარანტი ეჭირა, რამაც პოლიციის ყურადღება მიიქცია და სტუდენტი სწორედ ამის შემდეგ აიყვანეს.

ლუკა ხიზაძეს დაკავება მოხდა ჭავჭავაძის გამზირზე, მიმდებარე ტერიტორიაზე, ღამის 2 საათზე. შინაგან საქმეთა სამინისტროს წარმომადგენლები ედავებიან დაუმორჩილებლობას. რეალურად, ლუკა ხიზაძეს შევხვდი იზოლატორში და განმიმარტა, რომ მისი მხრიდან დაუმორჩილებლობას ადგილი არ ჰქონია, უბრალოდ მას ხელში ეჭირა სტენსილი, აქედან გამომდინარე, პოლიციის თანამშრომლების მხრიდან მოხდა მისი გადამოწმება და შემდგომში აიყვანეს.

წარწერა იყო ივანიშვილის რეჟიმის საწინააღმდეგოდ, სიღარიბის საწინააღმდეგოდ და დასრულდეს მილიცია – ასეთი სიტყვით იყო გამოხატული აღნიშნული. ლუკას დაუმორჩილებლობა არ განუხორციელებია. თავისი ნებით გაყვა და ობიექტურად მიაწოდა ინფორმაცია პოლიციას”, – ამბობს ადვოკატი. 

ცნობისთვის, გამთენიისას თბილისის სახელმწიფო უნივერსიტეტისა და საქართველოს ტექნიკური უნივერსიტეტის სამი სტუდენტი – აჩი გოჩიტაშვილი, ლუკა ხიზაძე და გიორგი ბარბაქაძე დააკავეს.

ახალგაზრდებს წვრილმან ხულიგნობასა და პოლიციისადმი დაუმორჩილებლობას ედავებიან.