ადვოკატი, მარი საბიაშვილი, სოციალურ ქსელში ღია წერილს აქვეყნებს:
“ღია წერილი
მივმართავ სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს დირექტორს. საქართველოს ოკუპირებული ტერიტორიებიდან დევნილთა, შრომის ჯანმრთელობისა და სოციალური დაცვის მინისტრს. შინაგან საქმეთა სამინისტროს. აჭარის მთავრობას.
ყველას მოგვეხსენება, რაოდენ დიდი პრობლემებია ბავშვზე ზრუნვის სამსახურში, განსაკუთრებით სააღსრულებო საქმისწარმოებებთან დაკავშირებით. ვიცით, ამ სტრუქტურას პრობლემები აქვს კადრებთან მიმართებაშიც, რაც ჩემი აზრით, ერთის მხრივ -განპირობებულია დაბალი თანამდებობრივი სარგოს შეთავაზებით, ხოლო მეორეს მხრივ-თანამშრომელთა მოტივაციის არქონით.
სწორედ ამიტომ, პირადად მე ვცდილობ და დაინტერესებული ვარ, მინიმალურით მაინც დავეხმარო სტრუქტურას (თუ რას ვაკეთებ ამისთვის, აქ აღარ დავწვრილმანდები). თუმცა, ვიდრე გრძელვადიან პერსპექტივაში რაღაც გამოსწორდება, მომავალი გვეღუპება. სახელმწიფოს ნება უმთვრესია, საწყისისთვის მინიმალურ დონეზე მაინც რამე შეიცვალოს. მერწმუნეთ, ეს თუ ახლავე და მყისიერად არ მოხდა, მივიღებთ გამოუსწორებელ შედეგებს-ფსიქოლოგიურად განადგურებულ ბავშვებს, რასაც მომავალი პერსპექტივები ვეღარ უშველის.
სააღსრულებო საქმისწარმოება მარტივი არ გახლავთ. ეს რომ შეძლოს განყოფილებამ, უნდა ჰყავდეს კვალიფიციური, საქმის მცოდნე უფროსი, იურისტი და სოციალური მუშაკი..უკიდურეს შემთხვევაში, ერთი ასეთი თანამშრომლის არსებობაც საქმეს წაადგება (მეტნაკლებად), თუმცა პრობლემა იმაში მდგომარეობს, რომ ზოგიერთ განყოფილებაში, ასეთს საერთოდ ვერავის ვპოულობთ. არადა, საქმის უცოდინრობა და სააღსრულებო წარმოების არასწორად მართვა, იწვევს გაუცხოვებას მშობლებსა და შვილებს შორის, აგრეთვე, ბავშვებში ფსიქიკურ პრობლემებს, არაჯანსაღ განვითარებას და აშ..
უკიდურესი ვითარებაა აჭარის რეგიონში. უამრავი სააღსრულებო წარმოება გაპრობლემებულია. თანამშრომლები სწორად ვერ აფასებენ ბავშვების საუკეთესო ინტერესებს, არ იციან რა ევალებათ, როგორ იმოქმედონ და რა მითითებები გასცენ იმისათვის, რომ აღასრულონ სასამართლო გადაწყვეტილებები.
ეს ყველაფერი კატასტროფულ შედეგებამდე მიგვიყვანს.
აჭარიდან მიკავშირდებიან სხვა ადვოკატებიც და იგივე პრობლემებზე საუბრობენ.. (თუმცა კიდევ აღვნიშნავ, მხოლოდ აჭარა არ განიცდის კრიზისს ამ კუთხით)..
საბოლოო ჯამში, ჩვენ ვღუპავთ ჩვენს შვილებს, ჩვენს მომავალს და მორალურად ვანადგურებთ მშობლებს, ვინც შვილებთან ვერ ურთიერთობენ.
გულგრილი დამოკიდებულება იკვეთება, შინაგან საქმეთა სამინისტროს მხრიდანაც, არასრულწლოვანი ბავშვების საქმეებზე.
და ბოლოს.. თქვენც ხომ მშობლები ხართ? შვილები არ გყავთ? რას მოიმოქმედებდით თქვენ რომ ვერ ურთიერთობდეთ მათთან?
თხოვნაა, მიხედეთ ამ უწყებას და ნუ აბოროტებთ ადამიანებს, თქვენი უმოქმედობით ნუ უბიძგებთ მშობლებს დანაშაულის ჩადენისკენ.
დევნილთა, შრომის, ჯანმრთელობისა და სოციალური დაცვის სამინისტრო
!!! აჭარის მთავრობა / Government of Ajara
შინაგან საქმეთა სამინისტრო / Ministry of Internal Affairs of Georgia“
კომენტარები