შს მაღალჩინოსანმა, რომელმაც ბუტა რობაქიძის საქმეზე ირაკლი ოქრუაშვიულის წინააღმდეგ ჩვენება მისცა, თავისუფლება მიიღო – ამის შესახებ შინაგან საქმეთა ყოფილი მინისტრის, ირაკლი ოქრუაშვილის ადვოკატმა განაცხადა.
კახა წერეთელი ეხმაურება თბილისის საქალაქო სასამართლოს გადაწყვეტილებას, რომლის მიხედვითაც ბუტა რობაქიძის მკვლელობის საქმეზე ყოფილ შინაგან საქმეთა მინისტრს, ირაკლი ოქრუაშვილს 7 წლით თავისუფლების აღკვეთა მიესაჯა, ამავე საქმეზე ბრალდებული ზურაბ ადეიშვილი კი გაამართლა.
მისი თქმით, აღნიშნული პირი წლების განმავლობაში საკუთარ ჩვენებას ცვლიდა.
“წარდგენილი იყო ბრალდება, 2004 წელს ამირან რობაქიძის საქმესთან დაკავშირებით, თითქოს მაშინდელმა შინაგან საქმეთა მინისტრმა, ბატონმა ირაკლი ოქრუაშვილმა გასცა განკარგულება, შემთხვევის ადგილი წარმოჩენილიყო ისე, თითქოს ადგილი ჰქონდა ორმხრივ სროლას და ამის საფუძველზე თითქოს მიტანილი იქნა შემთხვევის ადგილზე იარაღი და მოხდა ფალსიფიკაცია შემთხვევის ადგილის.
რაც შეხება მტკიცებულებებს, ნამდვილად არ არსებობდა ოდნავ მიახლოებული მტკიცებულებაც იმისთვის, რომ მომხდარიყო ოქრუაშვილის დამნაშავედ ცნობა, ვინაიდან მთელი საქმე ემყარება, რეალურად, ერთი პირის ჩვენებას, მაშინდელი მაღალჩინოსნის შსს-სი, რომელმაც ეს დავალება თითქოს მიიღო. ის წლების განმავლობაში აძლევდა რადიკალურად განსხვავებულ ჩვენებებს და მხოლოდ პატიმრობაში ამ ჩვენების სანაცვლოდ მან მიიღო თავისუფლება და ეს არის სამწუხაროდ, ის სტანდარტი, რაც საკმარისად ჩათვალა სასამართლომ და იყო კიდევ ერთი ანალოგიური ირიბი ჩვენება, რომ თითქოს ამ პირისგან გავიგე, რომ მინისტრმა დამალაო. ერთ-ერთი ამ პირთაგან იყო გურამ დონაძე” – ამბობს კახა წერეთელი.
ცნობისთვის, ბუტა რობაქიძის საქმეზე ყოფილი შს მინისტრი, ირაკლი ოქრუაშვილი სასამართლომ დამნაშავედ ცნო. მას სამსახურებრივი უფლებამოსილების ბოროტად გამოყენებას ედავებოდნენ.
კომენტარები