შეუძლიათ თუ არა უცხო ქვეყნის მოქალაქეებს საქართველოში ვაქცინაცია და რა კრიტერიუმებს უნდა აკმაყოფილებდნენ

კორონავირუსის საწინააღმდეგო აცრა, საქართველოს მოქალაქეების გარდა, უცხო ქვეყნის მოქალაქეებსაც შეუძლიათ. ჯანდაცვის სამინისტრომ მათთვის რამდენიმე ამცრელი პუნქტი გამოჰყო. უწყების ინფორმაციით, საქართველოში მყოფ ბინადრობის მოწმობის არმქონე უცხო ქვეყნის მოქალაქეებს ვაქცინაცია შეუძლიათ თბილისში, აკადემიკოს ნიკოლოზ ყიფშიძის სახელობის ცენტრალურ საუნივერსიტეტო კლინიკაში, ბათუმში – რესპუბლიკურ საავადმყოფოში, ქუთაისში – ჩხობაძის სახელობის ინვალიდთა და ხანდაზმულთა სამკურნალო-სარეაბილიტაციო კლინიკური ცენტრში.

რა შემთხვევაში შეუძლია უცხო ქვეყნის მოქალაქეს საქართველოში იმუნიზაცია

კორონავირუსის საწინააღმდეგო ვაქცინის გაკეთება შეუძლიათ:

 საქართველოს ტერიტორიაზე ლეგალურად მყოფ უცხო ქვეყნის მოქალაქე/მოქალაქეობის არმქონე პირს, რომელიც საქართველოში იმყოფება და მისი შემოსვლიდან გასულია, სულ მცირე, 3 თვე;

სახელმწიფო პროგრამის – „იმუშავე საქართველოდან“ მონაწილე უცხო ქვეყნის მოქალაქეებსა და მათი ოჯახის წევრებს;

საქართველოში განათლების მიღების მიზნით მყოფ უცხო ქვეყნის მოქალაქე სტუდენტებს;

საქართველოში აკრედიტებული დიპლომატიური წარმომადგენლობების, საკონსულო დაწესებულებების, საერთაშორისო ორგანიზაციების წარმომადგენლობების უცხოელ თანამშრომლებსა და მათ ოჯახის წევრებს;

საქართველოს ოკუპირებულ ტერიტორიებზე მყოფ მოსახლეობას, მოქალაქეობის მიუხედავად; ასევე, ოკუპირებულ ტერიტორიაზე დიპლომატიური მისიებისა და საერთაშორისო დონორი ორგანიზაციების მიერ დაფინასებულ პროექტებში მომუშავე პირებსა და მათი ოჯახის წევრებს;

პენიტენციურ დაწესებულებებში მყოფ პირებს;

N164 განკარგულებით განსაზღვრულ უცხო ქვეყნის მოქალაქეს, რომლის ოჯახის წევრი (შვილი, მშობელი, მეუღლე) საქართველოს მოქალაქეა.

საქართველოში კორონავირუსის საწინააღმდეგო იმუნიზაცია, ამჟამად, სამი ვაქცინით არის შესაძლებელი – „ფაიზერით“, „სინოვაკითა“ და „სინოფარმით“.