“შეშფოთება გამოიწვია ტერმინმა „თვინდემია“, ეს ტერმინიც ახალი არ არის და შარშანაც გაჟღერდა” – ბუწაშვილი

ინფექციონისტი, მაია ბუწაშვილი:

„შეშფოთება გამოიწვია ტერმინმა „თვინდემია“, რომელიც უბრალოდ კოვიდის პანდემიის და სეზონური გრიპის ეპიდემიის თანხვედრას (ინგლისური სიტყვიდან Twin – ტყუპი) ნიშნავს, რაც, რა თქმა უნდა, ამ სეზონზე მოსალოდნელია, ისევე როგორც წინა სეზონზე იყო მოსალოდნელი.

ეს ტერმინიც ახალი არ არის და შარშანაც გაჟღერდა. საბედნიეროდ, შარშან გრიპის სეზონი მოულოდნელად კარგად გადავიარეთ. მაღალი ალბათობით კოვიდის შეზღუდვებმა გრიპის პროფილაქტიკის მიმართულებით დადებითად იმუშავა.

წელს, ვინაიდან ბევრ ქვეყანაში კოვიდ რეგულაციები მკვეთრად არის შემსუბუქებული, შიშობენ, რომ გრიპი ცოტა უფრო მეტად შემოგვიტევს, ვიდრე შარშან.

თუმცა იმედია ასე არ იქნება. ჩვენზე რაც არის დამოკიდებული, გრიპის ვაქცინა უნდა გავიკეთოთ (როცა ხელმისაწვდომი გახდება, რა თქმა უნდა)“