ნაციონალური მოძრაობის წევრი, გიორგი ბარამიძე:
“მეგობრებო, კიდევ ერთხელ მინდა მკაფიოდ და გასაგებად, წერილობითაც დავაფიქსირო ჩემი პრინციპული პოზიცია რაც შეეხება ენმ ბოლო ყრილობაზე პოლიტიკური საბჭოს არჩევას.
მიუხედავად იმისა, რომ ყრილობაზე საბჭოს წევრთა (რაოდენობრივად) მხოლოდ 1/3 აირჩა და დარჩა კიდევ ასარჩევი 2/3, მიმაჩნია, რომ უკვე არჩეულებს შორის აუცილებლად უნდა ყოფილიყო თავმჯდომარის არჩევნებისას ჩვენი ამომრჩევლის ხმების 40% -ის მიმღები ნიკა მელია და ასევე ჩვენი პარტიის ისეთი მართლა ღვაწლმოსილი წევრები, როგორებიც არიან ნუგზარ წიკლაური, გიორგი პატარაია, ზურაბ მელიქიშვილი, მურთაზ ზოდელავა, ეკა წამალაშვილი და სხვა ბევრი ჩვენი თანამებრძოლი.
კობა ხაბაზი ფრონტის წინა ხაზზეა და ცხადია, უნდა ყოფილიყო, მაგრამ მან სამწუხაროდ უარი განაცხადა, ისევე როგორც კობა ნაყოფიამ, ეკა ხერხეულიძემ, აკო მინაშვილმა, გიორგი კირთაძემ.
ეს მათ ნიკასადმი სოლიდარობისა და საბჭოს არჩევის ამგვარი ფორმის მიმართ პროტესტის ნიშნად გააკეთეს.
ყრილობაზე რა წესითაც ავირჩიეთ საბჭო, ჩემთვისაც და ბევრი ჩვენი ამაგდარი წევრისა და თანამებრძოლისთვისაც მოულოდნელობა იყო და ამან გამოიწვია გაუგებრობა და ამგვარი უხერხულობა, რაც აუცილებლად უნდა გამოსწორდეს.
ზუსტად იგივე პოზიცია მექნებოდა ამგვარ ვითარებაში ნიკას და კამპანიისას მისი მხარდამჭერების მაგივრად,
40% ხმების მიმღები (ან გინდაც 15-ის) ლევან ხაბეიშვილი და მისი მხარდამჭერი ჩვენი სხვა მეგობრები რომ ყოფილიყვნენ.
ვფიქრობ, გამარჯვებულმა მხარემ მეტი უნდა გააკეთოს პარტიის ერთიანობის შესანარჩუნებლად.
იმედი მაქვს ლევანი და პარტიის ახალი (ყრილობაზე არჩეული) ხელმძღვანელობა ამ მიმართულებით შესაბამის ნაბიჯებს გადადგამს. თუნდაც იმ კვოტების გამოყენებით, რაც ახალი წესდებით აქვს ენმ თავმჯდომარეს ან გენერალურ მდივანს. ცხადია არის საბჭოს წევრების ადგილზე არჩევის ვარიანტიც.
ვიცი ძნელია მწარე დაპირისპირების შემდეგ კვლავ ერთად ყოფნაზე საუბარი და მით უფრო მოქმედება, მაგრამ ეს ჩვენი მოვალეობაა და ამას გვკარნახობს პუტინისტური, მოღალატეთა რეჟიმის დამარცხების ეროვნული მნიშვნელობისა და მასშტაბის ინტერესები, რაც თვითოეული ჩვენგანის პირად წყენებზე, ობიექტურად, ათასჯერ დიდია.
ენმ უნდა იყოს ერთი მიზნის მქონე, მაგრამ ბრძოლის ტაქტიკის შესახებ, განსხვავებული აზრის მქონე, ნამდვილი პატრიოტების, ერთიანობის მაგალითი, რადგან სწორედ ერთიანობაა ჩვენი გამარჯვების ფორმულა.
ერთიანობა უნდა გვქონდეს არა მარტო ენმ-ში, არამედ მთელს ქართულ პატრიოტულ ძალებსა და საზოგადოებაში.
პარტიის არჩეულმა თავმჯდომარემ, ლევან ხაბეიშვილმა რამდენჯერმე ყრილობაზეც და შემდეგაც მკაფიოდ გაუსვა ამას ხაზი და ვიცი ასევე ყველას გვესმის ერთიანობის ფასი და მნიშვნელობა.
ერთიანობა და ერთობლივი მოქმედებები განსაკუთრებით მნიშვნელოვანი გახდა, ივანიშვილის ბრძანებით, ჯიბის სასამართლოს მიერ, მიშას კვლავ მეთოდურად მოკვდინების რეჟიმში, პუტინის ტყვედ დატოვება.
ძვირფასო მეგობრებო, თანამებრძოლებო, შემთხვევითი არაა, რომ მიშამაც სწორედ ეს გაგვახსენა, ძალა ერთობაშია!
მჯერა თუ ერთად ვიქნებით, აუცილებლად გავიმარჯვებთ.
დიდება საქართველოს!
#თავისუფლებამიშას და ნიკას!
Slava Ukrayni!??❤️??❤️??❤️??✌️”
კომენტარები