„შეგნებულად გიშლით ხელს“ – ნატა ფერაძემ „ქრონიკის“ ჟურნალისტს აქციის გაშუქების საშუალება არ მისცა

„იმედის“ გადამღებ ჯგუფებს კვლავ მიხეილ სააკაშვილის მხარდამჭერების პროვოკაციების რეჟიმში უწევთ მუშაობა. ამჯერად, „ქრონიკის“ ჟურნალისტს, სოფო ბერიძეს არ მისცეს მუშაობის საშუალება. აქციიდან პირდაპირი ჩართვის დროს, ჟურნალისტს ნატა ფერაძე მიუახლოვდა, რომელიც შეუჩერებლად იმეორებდა ფრაზას: „გადაიყვანეთ მიხეილ სააკაშვილი“.

მიუხედავად სამართალდამცველის მითითებისა, მან ჟურნალისტისთვის ხელის შეშლა მაინც არ შეწყვიტა. „შეგნებულად გიშლით ხელს“, – უთხრა ნატა ფერაძემ ჟურნალისტს. მისივე განცხადებით, ჟურნალისტისთვის ხელის შეშლა სიტყვისა და გამოხატვის ჩარჩოში ჯდება.

მიხეილ სააკაშვილის მხარდამჭერები, ორგანიზებულად, ლიდერების მითითებით, სადაც „იმედის“ კამერა ჩნდება და გადამღები ჯგუფი პირდაპირი ეთერის რეჟიმში მუშაობს, ყველგან და ყოველთვის ცდილობენ სამუშაო პროცესის ჩაშლას, აყენებენ შეურაცხყოფას, აბულინგებენ ჟურნალისტებს და არ აძლევენ მუშაობის შესაძლებლობას.

ასე მოხდა გუშინ, გლდანის #18-ე დაწესებულებასთანაც, სადაც „იმედის“ გადამღებ ჯგუფს სააკაშვილის აგრესიულად განწყობილმა მხარდამჭერებმა მუშაობის საშუალება არ მისცეს.