„საუბედუროდ, ვერც წინა ხელისუფლების შეცდომებზე ისწავლეთ ვერაფერი!“ – ირაკლი მელაშვილი ხელისუფლებას მიმართავს

საუბედუროდ, ვერც წინა ხელისუფლების შეცდომებზე ისწავლეთ ვერაფერი! – საქართველოს პარლამენტის ყოფილი წევრი ირაკლი მელაშვილი იუსტიციის სამინისტროის მიერ მიხეილ საკაშვილის მე-18 დაწესებულებაში გადაყვანის კადრების გასაჯაროებას ეხმიანება და ხელისუფლებას მიმართავს:

„აბსოლუტურად ყველა ფსკერი მაშინ გაიხვრიტა, (თუმცა მერამდენედ უკვე ვეღარ ვითვლი!) როცა ვიღაცამ ხელისუფლებაში მიიჩნია და ალბათ სხვებიც დაეთანხმნენ, რომ ამ კადრების ჩვენება მათთვის მომგებიანი იქნებოდა. როგორ არ უნდა იცნობდე საკუთარ ხალხს და საზოგადოებას, როგორი დაბალი წარმოდგენა უნდა გქონდეს მათზე, ასე რომ ჩათვალო! “კოკასა შიგან რაცა დგას, იგივე წარმოდინდების”. მე მგონი იმდენად აერიათ გონება, დაავიწყდათ, რომ საკუთარი ტროლების და ბოტების პოსტები, არა საზოგადოების განწყობის გამოხატულება, არამედ მათ მიერვე დაფინანსებული ფეიქ გამოხმაურებებია! ხელისუფლების მხრიდან, ადამიანის საჯარო დამცირებას, (ამ კადრების გასაჯაროვება სწორე ესაა) უზნეობას, რაღაც მომენტში ხალხი შეიძლება სიჩუმით შეხვდეს, ხმა არ ამოიღოს, მაგრამ ამაზე მეტად ხელისუფლების ავტორიტეტს არაფერი აზიანებს, ეს ყოველთვის თავს იჩენს და თავადვე ამის გამკეთებლეს შემოუბრუნდება უკან მოზრდილი ბუმერანგივით. საუბედუროდ, ვერც წინა ხელისუფლების შეცდომებზე ისწავლეთ ვერაფერი!“ – წერს ირაკლი მელაშვილი.