“საჭიროა ფინანსური სანქციები „ოცნების“ და მედიაორგანიზაციების წინააღმდეგ” – დიდი ბრიტანეთის ანგარიში

დიდი ბრიტანეთის საგარეო საქმეთა კომიტეტი ანგარიშში „დეზინფორმაციული დიპლომატია — როგორ ცდილობენ მავნე სუბიექტები დემოკრატიის შერყევას“ საქართველოს შესახებაც ამახვილებს ყურადღებას და ქვეყანაში მიმდინარე პროცესებს კრიტიკულად აფასებს.

დოკუმენტში საუბარია დემოკრატიის უკუსვლაზე, ავტოკრატიის კონსოლიდაციის რისკებზე და დასავლური კურსიდან გადახვევაზე. ბრიტანელი კანონმდებლები მოუწოდებენ საკუთარი მთავრობის წარმომადგენლებს, განიხილონ დამატებითი სანქციების დაწესება იმ პირების მიმართ, რომლებიც, მათი შეფასებით, ხელს უშლიან ქვეყნის დემოკრატიულ განვითარებას და ავრცელებენ დეზინფორმაციას.

ანგარიშში ცალკე თავი ეთმობა ბიძინა ივანიშვილს, რომლის შესახებაც აღნიშნულია, რომ მან ფინანსური კაპიტალი რუსეთში დააგროვა და საქართველოში პრორუსული ნარატივების გავრცელებაში ფიგურირებს.

კომიტეტი ღრმად არის შეშფოთებული საქართველოში დემოკრატიის განგრძობადი გაუარესების გამო, რაც, მისი ამჟამინდელი ტრაექტორიით, გამოიწვევს ჩამოყალიბებულ ავტოკრატიას, რომელიც მყარად იქნება მოქცეული რუსეთის გავლენის სფეროში, ბელარუსის მსგავსად. ჩვენ ვგმობთ „ქართული ოცნების“ მთავრობის ქმედებებს ევროკავშირში გაწევრიანების მოლაპარაკებების შეჩერების, ოპოზიციური ძალების რეპრესიის, ლეგიტიმური პროტესტის შეზღუდვისა და დეზინფორმაციის გავრცელების გამო. ეს ქმედებები წარმოადგენს რუსული სახელმძღვანელოს იმიტაციას და მიუთითებს თბილისსა და მოსკოვს შორის კოორდინაციაზე. ჩვენ მხარს ვუჭერთ გაერთიანებული სამეფოს მთავრობის მიერ უკვე გადადგმულ ნაბიჯებს იმ ქართველი ოფიციალური პირების დასანქცირების შესახებ, რომლებიც პასუხისმგებელნი არიან ლეგიტიმური პროტესტის საპასუხოდ ადამიანის უფლებების დარღვევის ხელშეწყობაზე, – ნათქვამია ანგარიშში. 

ჩვენ მოვუწოდებთ მთავრობას, აამოქმედოს ახალი მიზანმიმართული ფინანსური და სამგზავრო სანქციები „ქართული ოცნების“ იმ ოფიციალური პირების წინააღმდეგ, რომლებიც მხარს უჭერენ „უცხოური აგენტების“ შესახებ კანონს, ქართველი კლეპტოკრატებისა და იმ ქართული მედიაორგანიზაციების წინააღმდეგ, რომლებიც ავრცელებენ დეზინფორმაციას. ეს დამატებითი სანქციები მნიშვნელოვნად გაზრდის ფასს მათთვის, ვინც ცდილობს ძირი გამოუთხაროს ქართველი ხალხის სურვილს ევროპული კურსისადმი და იქნება ნიშანი, რომ გაერთიანებული სამეფო მხარს უჭერს საქართველოს დემოკრატიას და არა ავტოკრატიას, – წერია დოკუმენტში. 

აღსანიშნავია, რომ ბრიტანელი პარლამენტარები საქართველოში მოვლნების აღწერის და მისი განხილვის დროს საერთაშორისო და სამართლებრივ დოკუმენტებს ეყრდნობიან. მათ შორის, საუბარია ევროპარლამენტის რეზოლუციებზე, ეუთოს საპარლამენტო ასამბლეის დოკუმენტებს და მოსკოვის მექანიზმის დასკვნებს.

გარდა ამისა, დოკუმენტი ასევე ეყრდნობა სალომე ზურაბიშვილთან ინტერვიუსაც.