გზის გადაკეტვის ბრალდებით დაკავებულმა იმედია კლდიაშვილმა სასამართლოს მიმართა და თქვა:
ბრალდების ლოგიკას რომ გავყვეთ, ადგილი აღარ დარჩება პროტესტის გამოხატვისთვის. როგორ წარმოგიდგენიათ ისეთი პროტესტი, რომელიც არავის დისკომფორტს არ შეუქმნის. მითხარით, როდის და სად შემიძლია გავაპროტესტო?!
2024 წლის არჩევნების არაჯანსაღ და გაყალბებულად ჩატარების პროტესტია ეს ყველაფერი. ათეულში მაინც შევდივარ, ვინც ზუსტად იცის, რა ხდება საარჩევნო კოდექსში, რა მოხდა და როგორ გააყალბეს. ზუსტად ვიცი, როგორ ატრიალეს კარუსელები, როგორ აშინებდნენ მოქალაქეებს. ამას ვაპროტესტებ 2024 წლიდან და ეს არის ნომერი პირველი მიზეზი. ამ კანონით, ახლა რომ მიიღეს, პროტესტის უფლებაც აღარ მაქვს და მაგასაც ვაპროტესტებ.ამ ქვეყანაში არსებობენ ადამიანები, ვისაც შვილების გაზრდა უნდა. ყველა მოსვლას ვერ ახერხებს. გამოჩნდა ეს ფანჯარა 9-დან 11 საათამდე, როცა შეგვიძლია, თან ოჯახი ვარჩინოთ, თან ჩვენი მოქალაქეობრივი ვალი მოვიხადოთ. ამის ჩაქრობა უნდა „ქართულ ოცნებას“. კობახიძეს, რომელსაც ჰგონია, რომ რაღაცას მოიგებს, პირიქით არის. ველი 10-დღიან სასჯელს. თქვენც ჩემი გეგმის ნაწილი ხართ, ბატონო მოსამართლევ. ამ სასჯელს რომ მოვიხდი, პირველი, რასაც ვიზამ, გავალ რუსთაველზე და გავაგრძელებ პროტესტს. ვიცი, რომ მერე ერთწლიანი პატიმრობა მელის. თუ ვინმე ჩემი ახლობელი და მეგობარი თავს იკავებდა გამოსვლაზე, ისიც გამოვა და ასეთი ადამიანი ბევრი ვიქნებით. მე იქ ვერ მივიღებ საკვებს და გამოვაცხადებ შიმშილობას. ესეც იყოს ანონსად”
ცნობისთვის, პროკურატურა 10–დღიან პატიმრობას ითხოვდა, მოსამართლემ 9 დღიანი პატიმრობა შეუფარდა.
კომენტარები