“სასამართლო, გაითვალისწინეთ, სულელები არ ვართ… კობახიძე მოსდევს ფეხდაფეხ მზია ამაღლობელს” –

ბათუმის საქალაქო სასამართლოში მზია ამაღლობელის დასკვნითი სასამართლო პროცესი მიმდინარეობს.

სხდომაზე ამაღლობელის ადვოკატმა, მაია მწარიაშვილმა „ქართული ოცნების“ ხელისუფლების წარმომადგენლების, მათ შორის ირაკლი კობახიძის და შალვა პაპუაშვილის ციტატები წაიკითხა, მზია ამაღლობელის შესახებ, რომ თითქოს, ჟურნალისტი უცხოეთის დაკვეთით მოქმედებდა.

ამასთან, ადვოკატმა გაიხსენა მოწოდებები, რომ მზია ამაღლობელმა უნდა აღიაროს და მოინანიოს „დანაშაული“.

ამის შემდეგ კი მოსამართლე ნინო სახელაშვილს მიმართა:

მოსამართლე არ მეგულება, ნუ მიიღებთ ამას პიროვნულ შეფასებად, მაგრამ თუკი მოსამართლეს არ შეუძლია ეს თქვას, თუკი მოსამართლეს არ შეუძლია მიუთითოს ხელისუფლებას ამეებზე და როგორც იტყვიან დასვას თავის ადგილას, იმ საკითხებზე სადაც მას არაფერს ეკითხებიან, ჩვენ ასეთი სასამართლოს მიმართ რა მოლოდინი უნდა გვქონდეს. წარმოგიდგენიათ ჩემი როლი?

გუშინ არ მოვედი პროფესიაში, დღეს უნდა ვთქვა დასკვნითი სიტყვა და პრემიერი მოსდევს ფეხდაფეხ მზია ამაღლობელს, ანუ რას ვუპასუხო, პრემიერის კომენტარებს თუ მქონდეს რწმენა რომ ამ სასამართლოს შეუძლია გაუმკლავდეს ამ ტიპის ზეწოლას? თავისთავად ცხადია, მაპატიეთ, მაგრამ მე არ მჯერა, რომ ამ სასამართლოს ეს უნარები აქვს და არც ის მჯერა, რომ ამ ქვეყანაში რომელიმე მოსამართლეს ეს უნარები აქვს, სამწუხაროდ. მიუხედავად ამისა, იძულებული ვარ დავიწყო ჩემი დასკვნითი სიტყვა და სასამართლოს მინდა ვუთხრა, რომ გაითვალისწინოს, სულელები არ ვართ ჩვენ აქ არცერთი, მზიას ინტერესების დამცველები, მაგრამ იძულებულები ვართ ამ რეალობის გათვალისწინებით დავიწყოთ ჩვენი დასკვნითი სიტყვა ამ სასამართლოზე“,- განაცხადა მწარიაშვილმა.

ბათუმის საქალაქო სასამართლოში მზია ამაღლობელის დასკვნითი სასამართლო პროცესი იმართება. შესაძლოა, მოსამართლე ნინო სახელაშვილმა საქმეზე გადაწყვეტილება დღესვე გამოაცხადოს.

შეგახსენებთ, რო მზია ამაღლობელს ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მზია ამაღლობელი, ბათუმში, პოლიციის მთავარ სამმართველოსთან აქციის დროს თავდაპირველად ადმინისტრაციული წესით დააკავეს, დაახლოებით ორ საათში გამოუშვეს. გათავისუფლებიდან რამდენიმე წუთში კი, ის სამმართველოსთან კვლავ დააკავეს.

წყარო: პუბლიკა