საქმის გარჩევა შსს–ში “ლაიქის” გამო და ემიგრაციაში წასული ყოფილი თანამშრომლების სია

ტვ პირველის “შაბათის ეთერი” აქვეყნებს სიას, შსს–ს იმ მაღალჩინოსნების, რომლებმაც სამსახური და ქვეყანა დატოვეს, ფორმა გაიხადეს და ზოგი მშენებლობაზე მუშაობს ემიგრაციაში, ზოგიც მძღოლად და ა.შ.

იოსებ წეველიძე – პოლიციელი, რომელიც 2015 წელს დააჯილდოეს და გმირი უწოდეს, იძულებული გახდა, ქვეყანა დაეტოვებია. შეგახსენებთ, 2015 წელს, შვილთან ერთად სეირნობისას, დასვენების დღეს, შემთხვევით დაინახა, როგორ ტოვებდნენ მძარცველები ბანკს, შვილი იქვე მაღაზიასთან დატოვა და მათ დაედევნა. ახლა ის ამერიკაში, მშენებლობაზე მუშაობს. მიზეზი კი “ლაიქი” გახდა, მან ყოფილ უფროსს, კონსტანტინე ანანიაშვილს, რომელმაც თანამდებოდა, პრემიერ გახარიას გადადგომის შემდეგ მალევე დატოვა, ფოტო მოუწონა. თუმცა, სანამ 2015 წელს მას გმირს უწოდებდნენ, მანამდე, ძებნაზე მყოფი ავტომანქანის გაჩხრეკის გამო დააქვეითეს!

იოსებ წეველიძე მედიასთან ამბობს:

“არც აქ არის ვარდებით მოფენილი, ხან სად მუშაობ და ხან – სად. ფეისბუქ ლაიქების გამო, შენ ბიჭო რეებს ბედავ და რეებს აკეთებ და სულ აღარ აინტერესებთ მერე, რა გაქვს გაკეთებული, რა გაქვს დამთავრებული… და მაგის გამო რომ პოლიციიდან წამოხვალ… არ უთქვამთ, რომ წადი, მაგრამ სულელი ხომ არა ხარ, რო ვერ მიხვდე, სადაც არა სჯობს გაცლა სჯობს. ხელმძღვანელობამ რეებს ბედავო, რატომ ულაიქებო… ვაზელინი უნდა იყო, რომ დანაყოფში იმუშაო, მანამდე კოტე კოტე იყო? როცა თანამდბეობაზე იყო, როცა აჭარის დეპარტამენტში მუშაობდა, მერე როცა ბატონმა გიორგიმ დანიშნა გუბერნატორების ხელმძღვანელად? რომ დაგვინახავდნენ, მერაბიჩი მოგვიკითხეო და აღარ იყო მერაბიჩი და ჰოპ, უცებ შეცვალა 180 გრადუსით. მე არც არავის მხარდამჭერი არ ვიყავი არასოდეს.

2014 წელს წილოსანის ძმა გავჩხრიკე, სისხლის სამართლის საქმეზე ძებნილი ავტომანქანა იყო, შავი რენჯროვერი, მაგიტომ გამომიშვეს საპატრულოდან… დამიბარეს ქალაქის საპატრულოს უფროსი იყო მაშინ შალვა, რატომ გაჩხრიკეო, წადი ახლა შენი უბნელები ჩხრიკეო… ლაშა იჯდა საჭესთან, აბაშიძე, მაგ ამბიდან ერთ კვირაში გახდა გამგებელი და თვენახევარში ვიცე–მერი. ”

შსს–დან ემიგრაციაში წასული უკვე ყოფილი თანამშრომლების “ტვ პირველის” ინფორმაციით, ასეთია:

გოგა ჭანტურია – შსს–ს საექსპერტო კრიმინალისტიკური დეპარტამენტის თბილისის სამმართველოს უფროსი – ასევე ამერიკაშია და სამომხმარებლო სექტორშია დასაქმებული.

გურიის სამხარეო პოლიციის უფროსის ყოფილი მოადგილე და ოზურგეთის სამმართველოს ყოფილი უფროსი – არჩილ ახალკაცი – მექსიკიდან ამერიკაში ჩავიდა და მშენებლობაზე მუშაობს.

ვაკე საბურთალოს პოლიციის პირველი სამმართველოს უფროსი – ზაზა ოსეფაშვილი, ამერიკაში, ევაკუატორის მძღოლად მუშაობდა.

ეთერ კუნელაშვილი შსს–ს ექსპერტ–კრიმინალისტი – თავშესაფარი საფრანგეთში მოითხოვა.