“საქმე ეხება რუსთავის ციხეში გადმოყვანის პროცედურას” – სააკაშვილთან ინსპექტორის სამსახურის გამომძიებელი მივიდა

რუსთავის მე-12 პენიტენციურ დაწესებულებაში მიხეილ სააკაშვილთან შესახვედრად სახელმწიფო ინსპექტორის სამსახურის გამომძიებელი, ვასილ კაკაშვილი მივიდა. 

სახელმწიფო ინსპექტორის სამსახურის წარმომადგენელმა თქვა, რომ მიხეილ სააკაშვილისგან გორის სამხედრო ჰოსპიტალში მიმდინარე მოვლენებსა და რუსთავის ციხეში გადმოყვანაზე დეტალურ ინფორმაციას შეიტყობს. გარდა ამისა, მისი თქმით, გაგზავნილია წერილები კამერების ჩანაწერებთან დაკავშირებით. 

სავარაუდოდ, საუბარი ე.წ. საათისა და საკნად ქცეული პალატის ფანჯრის ამოქოლვის ეპიზოდსაც შეეხება. სხვა დეტალები კი შეხვედრის დასრულების შემდეგ გახდება ცნობილი.

“ადვოკატებმა მომართეს სახელმწიფო ინსპექტორის სამსახურის გორის სამხედრო ჰოსპიტალში განვითარებულ მოვლენებთან დაკავშირებით. მათ შორის საქმე ეხება მიხეილ სააკაშვილის რუსთავის ციხეში გადმოყვანის პროცედურას. მოხდება ამ საკითხთან დაკავშირებით მისი გამოკითხვა”,- თქვა კაკაშვილმა შესვლამდე.