საქართველომ რუსეთის წინააღმდეგ ტრიბუნალის შექმნას მხარი არ დაუჭირა

საქართველომ მხარი არ დაუჭირა ევროპის საბჭოს ფარგლებში რუსეთის წინააღმდეგ სპეციალური ტრიბუნალის შექმნას.

ამის შესახებ გუშინ სოციალურ ქსელში “ნაციონალური მოძრაობის” თავმჯდომარემ, თინა ბოკუჩავამ დაწერა. ოპოზიციონერის თქმით, ხსდომაზე “ოცნების” წარმომადგენელმა, განსხვავებით ყველა ევროკავშირის წევრი ქვეყნისგან, ტრიბუნალის შექმნას მხარი არ დაუჭირა.

PACE-ს პრეზიდენტთან შეხვედრაზე ხაზი გაესვა შემზარავ ფაქტს, რომ ევროსაბჭოს მინისტრთა კომიტეტზე, რომელმაც კენჭი უყარა რუსეთის უკრაინის მიმართ განხორციელებული აგრესიის სპეციალური ტრიბუნალის შექმნას, რის გამოც გუშინ აქ იმყოფებოდა პრეზიდენტი ზელენსკი, ოცნების წარმომადგენელმა მხარი არ დაუჭირა, განსხვავებით ყველა ევროკავშირის წევრი ქვეყნისგან, უნგრეთის გარდა. მორიგი დასტური ივანიშვილის რეჟიმის პუტინთან მოკავშირეობის”, – დაწერა ბოკუჩავამ. 

მინისტრთა კომიტეტზე კენჭისყრის შედეგები დახურულია, თუმცა 26 მაისს, ევროპის საბჭოს საპარლამენტო ასამბლეაში (PACE) გამართულ დებატებზე საქართველოს პოზიცია უკრაინელმა დეპუტატმა ოლექსი გონჩარენკომ გაამჟღავნა.

„აგრესიის შესახებ ტრიბუნალის შექმნა ჭეშმარიტად ისტორიული მომენტია. წევრი ქვეყნებიდან ექვსი ქვეყანაა, რომლებმაც ხელი არ მოაწერეს ამ შეთანხმებას. ამ ექვსი ქვეყნიდან ერთ-ერთი საქართველოა. საქართველო თავად არის რუსული აგრესიის მსხვერპლი. რუსეთს ოკუპირებული აქვს საქართველოს ტერიტორიების 20% — თითქმის იმდენივე, რამდენიც უკრაინაში. საქართველო მოსკოვის რეჟიმის მსხვერპლი კიდევ უფრო ადრე გახდა, ვიდრე ჩვენ. ამის შემდეგ საქართველო აღარ უჭერს მხარს რუსული აგრესიის წინააღმდეგ ტრიბუნალს. წარმოგიდგენიათ ეს?

ამიტომ კითხვაა: ვის სასარგებლოდ მუშაობს სინამდვილეში საქართველოს მთავრობა? ვინ არიან მათი ბატონ-პატრონები?“ — იკითხა გონჩარენკომ.

„ნეტგაზეთის“ ინფორმაციით, მინისტრთა კომიტეტის 24 ივნისის სხდომაზე ტრიბუნალის შექმნის წინააღმდეგ მისცეს ხმა უნგრეთმა, თურქეთმა და სერბეთმა. საქართველომ, სომხეთმა და აზერბაიჯანმა კი კენჭისყრაში მონაწილეობა არ მიიღეს.

25 ივნისს, უკრაინის პრეზიდენტმა ვოლოდიმირ ზელენსკიმ და ევროპის საბჭოს გენერალურმა მდივანმა ალენ ბერსემ ხელი მოაწერეს შეთანხმებას უკრაინის წინააღმდეგ აგრესიის დანაშაულზე სპეციალური ტრიბუნალის შექმნის შესახებ, რაც ტრიბუნალის წესდებასაც მოიცავს.