“სანთლის ანთებაც კი არ შეგვიძლია” – კირბალში, ხალხი უსაფრთხოების ზომების გამკაცრებას ითხოვს

კირბალში ხალხი უსაფრთხოების ზომების გამკაცრებას ითხოვს – სოფელში, რომელიც ე.წ. საზღვართან ყველაზე ახლოს მდებარეობს, პოლიციის არცერთი საგუშაგო არ არსებობს. იქ საპოლიციო კონტროლი მხოლოდ გუშინ გამკაცრდა, მას შემდეგ, რაც 60 წლის თამაზ გინტური ოკუპანტებმა მოკლეს.

ადგილობრივები `ტვპირველთან“ ამბობენ, რომ ოკუპანტების პირდაპირ მარტო დგანან და ყოველი გარეთ გასვლა მათთვის საფრთხის შემცველია.

იქ ეკლესია გვაქვს და მისვლა გვიჭირს, რომ სანთელი დავანთოთ. სანთლის დასანთებად რომ მივდივარ, რატომ უნდა მეშინოდეს, მითხარით. არ არის ლამაზი. ამ მთავრობამ ცოტა რაღაც მაინც ხომ უნდა გაგვიკეთოს. ლომისაში ვეღარ მივდივართ, ცხრანი ყოფილან ჩასაფრებულები, რომ უსვრიათ, ვიღაც ხომ შეიძლება დააყენონ, ან აგვიშვან ან არა”. – ამბობენ ადგილობრივები. 

ოკუპანტებმა საქართველოს მოქალაქე თამაზ გინტური სოფელ კირბალთან მოკლეს, მეორე ლევან დოთიაშვილი კი გაიტაცეს. ღამით საგანგებო შეხვედრა გაიმართა ერგნეთში – როგორც სახელმწიფო უსაფრთხოების სამსახურის წარმომადგენელმა განაცხადა, უმთავრესი მოთხოვნა გატაცებული ლევან დოთიაშვილის დაუყოვნებლივ დაბრუნება და დამნაშავეების სასწრაფო დასჯა იყო.