ახალციხესა და ახალქალაქში ორ არასრულწლოვანს MIS-C, იგივე მულტისისტემური ანთების სინდრომი აღმოაჩნდა. ექიმების განცხადებით, აღნიშნული დაავადება იმ პირებს ემართებათ, რომლებსაც კორონავირუსი აქვთ გადატანილი.
ორივე არასრულწლოვანი სამკურნალოდ თბილისში, იაშვილის სახელობის კლინიკაში გადაიყვანეს. ერთ–ერთმა მათგანმა მკურნალობის კურსი უკვე დაასრულა და სახლში გაწერეს, რაც შეეხება მეორეს, რომელიც ახალქალაქიდან არის, ჯერ კიდევ სამედიცინო დაწესებულებაში რჩება. მისი მდგომარეობა საშუალო სიმძიმისაა.
საავადმყოფოს სამედიცინო დირექტორის, ივანე ჩხაიძის განმარტებით, მულტისისტემური ანთების სინდრომი კორონავირუსგადატანილ მოზარდებს, გადატანიდან დაახლოებით ერთი თვის შემდეგ უვითარდებათ.
ძირითადი სიმპტომებია: მაღალი ტემპერატურა, დიარეა, ხველა, გამონაყარი და ა.შ.
„აღნიშნულ სინდრომს ერთდროულად ახასიათებს რამდენიმე სისტემის დაზიანება. სისხლში ცვლილებები მიუთითებენ ანთების არსებობაზე, ასევე ექმნებათ საჭმლის მომნელებელი და საშარდე სისტემების პრობლემები, მოქმედებს ნერვიულ სისტემაზეც, კანზე კი გამონაყარი უჩნდებათ“, – განმარტავს ჩხაიძე.
მისივე თქმით, ეს სინდრომი მოზარდებს 6 წლიდან ზევით ემართებათ. მათ კორონავირუსი შესაძლოა ისე ჰქონდეთ გადატანილი, რომ არც იცოდნენ.
ჩხაიძე განმარტავს რომ სინდრომის მქონე მოზარდებს მკურნალობა 2-3 კვირის განმავლობაში სჭირდებათ. პაციენტებს ჰორმონებით, გართულების შემთხვევაში კი ანტისხეულებით მკურნალობენ.
„არსებობს საერთაშორისო პროტოკოლი უმრავლეს შემთხვევაში ეს არის ჰორმონი. მკურნალობენ მინიმუმ სამი კვირის განმავლობაში. ძალიან მძიმე შემთხვევებში შეიძლება გამოყენებული იყოს ინტრავენური იმუნოგლობულინი. მძიმე შემთხვევები კი საბედნიეროდ ბავშვებთან იშვიათია“.
მისივე განმარტებით, მულტისისტემური ანთების სინდრომის შემთხვევაში აუცილებელია დაავადებულმა მულტიპროფილურ კლინიკაში იმკურნალოს.
„სინდრომის დიაგნოსტიკას ძალიან სპეციფიკური ლაბორატორიული ტესტები სჭირდება, რომელსაც ყველა საავადმყოფოში ვერ გააკეთებენ. ბავშვი აუცილებად უნდა მოთავსდეს საავადმყოფოში. საჭიროა ნეფროლოგის, ნევროლოგის, რევმატოლოგის, კარდიოლოგის, ჰემატოლოგის, ბავშთან ინფექციური დაავადებათა სპეციალისტის კონსულტაცია“.
ახალი სინდრომის შესახებ ინფორმაცია 2020 წლის გაზაფხულზე გავრცელდა. MIS-C–ს შეუძლია იერიში მიიტანოს ერთდროულად ბევრ ორგანოზე და დააზიანოს გულის ფუნქციონირება.
პედიატრიული მულტისისტემური ანთებითი სინდრომის შემთხვევები თავდაპირველად ბრიტანეთში, იტალიასა და ესპანეთში დაფიქსირდა. შემდეგ უკვე ამერიკასა და საფრანგეთში. აღნიშნულ სინდრომს მსოფლიოს სხვადასხვა ქვეყანაში რამდენიმე არასრულწლოვანიც ემსხვერპლა.
sknews.ge
კომენტარები