სამხედრო მოსამსახურის მკვლელი სამხედრო სასამართლომ პატიმრობაში დატოვა. ხვიჩა ვარდიაშვილმა, რომელმაც ვაზისუბანში 7 გასროლით მისი ახლობელი, ლაშა გუჯეჯიანი მოკლა, დღევანდელ სხდომაზე სიტყვის უფლება მხოლოდ ერთხელ გამოიყენა და ისიც იმის სათქმელად, რომ მძიმე მდგომარეობაში იმყოფება. პროცესზე ცნობილი გახდა ისიც, რომ სამხედროებს შორის კონფლიქტი ეჭვიანობის მიზეზი გახდა. მეგობარმა გუჯეჯიანმა მეგობრის ცოლს SMS შეტყობინება გაუგზავნა, რასაც ჯერ სიტყვიერი დაპირისპირება, შემდეგ კი მკვლელობა მოყვა.
ხვიჩა ვარდიაშვილს დანაშაულის ჩადენის ადგილი არ მიუტოვებია. საქმის მასალებით ირკვევა ისიც, რომ მან მკვლელობის ჩადენის შემდეგ მომხდარის შესახებ ჯერ უშუალო მეთაურს უამბო, შემდეგ კი პოლიციაში დარეკა. ადგილზე სამართალდამცველების მისვლისას, 39 წლის მამაკაცს თან ჰქონდა მის სახელზე რეგისტრირებული იარაღიც. ვარდიაშვილის ადვოკატი, რომელიც მისი დაცვის ქვეშ მყოფის გირაოს სანაცვლოდ გათავისუფლებას ითხოვდა, საქალაქო სასამართლოს გადაწყვეტილებას სააპელაციოში გაასაჩივრებს.
ხვიჩა ვარდიაშვილს მეგობრის მკვლელობის მოტივზე სასამართლოზე დღეს არაფერი უთქვამს – მან ბრალთან დაკავშირებით მოსამართლის კითხვას დუმილით უპასუხა.
მოსამართლე დავით მგელიაშვილმა ადგილზე თათბირით მიიღო გადაწყვეტილება და 39 წლის მამაკაცს საპატიმრო ვადა გაუხანგრძლივა. ხვიჩა ვარდიაშვილის ადვოკატი დღეს დაცვის ქვეშ მყოფის 10 000 ლარიანი გირაოს სანაცვლოდ გათავისუფლებას ითხოვდა.
ხვიჩა ვარდიაშვილის ადვოკატი, ლევან მარსაგიშვილი საქმის მასალებზე ჯერ არ საუბრობს. ამბობს, რომ თემა სენსიტიურია და დეტალებზე მომდევნო პროცესებზე გაამახვილებს ყურადღებას.
ჩატარებულ საგამოძიებო მოქმედებებზე მკვლელობის საქმის პროკურორმა სასამართლო პროცესის შემდეგ ვრცლად ისაუბრა. ბრალდების მხარის ინფორმაციით, გამოკითხულია ხვიჩა ვარდიაშვილის მეუღლე. ირკვევა, რომ სწორედ მას გაუგზავნა მესიჯი ლაშა გუჯეჯიანმა და მეგობრებს შორის კონფლიქტიც ამის გამო დაიწყო. საქმის გასარჩევად ვარდიაშვილი და გუჯეჯიანი ერთმანეთს წულუკიძის ქუჩაზე შეხვდნენ. მათ შორის სიტყვიერი კონფლიქტი მოკლულის ავტომობილში დაიწყო, რამდენიმე წუთში კი 39 წლის მამაკაცმა, კუთვნილი ცეცხლსასროლი იარაღიდან 43 წლის სამხედრო მოსამსახურეს 7-ჯერ ესროლა და მოკლა.
სამხედრო მოსამსახურე გუშინ ღამით საკუთარ სახლთან ახლოს მოკლეს. სავარაუდო დამნაშავეც სამხედრო მოსამსახურეა. ის სამართალდამცველებმა ცხელ კვალზე დააკავეს. პოლიციამ საგამოძიებო მოქმედებების ფარგლებში, დანაშაულის ჩადენის იარაღიც ამოიღო. გამოძიება 43 წლის ლაშა გუჯეჯიანის მკვლელობის საქმეზე განზრახ მკვლელობის მუხლით მიმდინარეობს.
კომენტარები