უკრაინაში რუსეთის ფართომასშტაბიანი შეჭრიდან ოთხი წლის თავზე საქართველოს მეხუთე პრეზიდენტმა, სალომე ზურაბიშვილმა, უკრაინის პრეზიდენტს ვოლოდიმირ ზელენსკისა და უკრაინელ ხალხს მიმართა.
ძვირფასო ვოლოდიმირ, ძვირფასო უკრაინელო მეგობრებო, ამ დღეს, 24 თებერვალს, მინდა, თქვენთან ერთად გავიზიარო ეს ძალიან მძიმე მომენტი, რომელიც დაუსრულებელი ომის 4 წლის დასრულებას აღნიშნავს.
ამ დროის განმავლობაში თქვენ აჩვენეთ რამდენად მამაცია უკრაინელი ხალხი, რამდენად გამძლე ხართ, როგორ შეგიძლიათ, გაუძლოთ ყველაფერს, რაც რუსულმა იმპერიალიზმმა დამართა თქვენს ქვეყანას.
ჩვენ ამ ტრაგედიას თქვენთან ერთად ვიზიარებთ, თუმცა ასევე ვიცით, რომ ეს ომი თქვენ არ წაგიგიათ. სინამდვილეში, რუსეთმა წააგო იგი და ვერ შეძლო თავისი საომარი მიზნების მიღწევა. ოთხი წლის შემდეგ ამ თითქოსდა დიდმა იმპერიამ ვერ მოახერხა თქვენი მუხლებზე დაჩოქება და ეს ძალიან დიდი წარმატებაა.
გისურვებთ, რომ მშვიდობა ძალიან მალე დადგეს, მაგრამ ნამდვილი მშვიდობა, რომელიც პატივს სცემს უკრაინელი ხალხის ნებას, პატივს სცემს უკრაინის სუვერენიტეტს და მის ტერიტორიულ მთლიანობას.
ჩვენთვის, ქართველებისთვის, ეს თარიღი ძალიან მნიშვნელოვანია. 1921 წელს 25 თებერვალს რუსეთი თავს დაესხა საქართველოს როგორც 2022 წლის 24 თებერვალს უკრაინას დაესხა თავს. ასე რომ, თებერვალი არის თვე, როდესაც რუსული იმპერიალიზმი თითქოს ცოცხლობს, მაგრამ ამას დასასრული ექნება. ვფიქრობ, რომ უკრაინაში რუსული ოკუპაციის დასრულებასთან ერთად ჩვენ ყველანი უნდა გავხდეთ მოწმენი რუსული ოკუპაციის დასრულებისა სხვაგანაც – სამხრეთ ოსეთში, აფხაზეთის რეგიონში, დნესტრისპირეთში და ყველგან, სადაც რუსეთი საკუთარ საზღვრებს სცდება, რადგან მშვიდობა ვერ იარსებებს, სანამ რუსეთი არ აღიარებს საკუთარ საზღვრებს.
დიდება უკრაინას!, – ამბობს სალომე ზურაბიშვილი ვიდეომიმართვაში.
კომენტარები