აშშ-ის მთავრობა დაჟინებით მოითხოვს, რომ რუსეთმა ოკუპირებული ტერიტორიებიდან უკრაინის მოქალაქეების, მათ შორის ბავშვების დეპორტაცია შეწყვიტოს და ყველა მათგანი საკუთარ სახლებში დააბრუნოს.
ამის შესახებ აშშ-ის სახელმწიფო დეპარტამენტის პრესსპიკერმა, მეთიუ მილერმა ვაშინგტონში გამართულ ბრიფინგზე განაცხადა.
„ერთ-ერთი ყველაზე ცუდი ინციდენტი, რომელიც ამ ომში ვნახეთ, არის უკრაინელი მშვიდობიანი მოსახლეობის რუსეთში დეპორტაცია, მათ შორის მშვიდობიანი მოქალაქეების, რომლებიც იძულებით დააშორეს თავიანთ ოჯახებს“, – აღნიშნა მილერმა, როდესაც სთხოვეს კომენტარი გაეკეთებინა რუსეთის ხელისუფლების მიერ 700 000-ზე მეტი უკრაინელი ბავშვის დეპორტაციის შესახებ გაკეთებულ განცხადებაზე.
მისივე თქმით, ეს იყო მნიშვნელოვანი საკითხი მდივნის გადაწყვეტილებაში, რომ რუსეთის ძალებმა და ოფიციალურმა პირებმა კაცობრიობის წინააღმდეგ დანაშაული ჩაიდინეს.
„ისევე როგორც ადრე, ამჟამადაც მოვუწოდებთ რუსეთს, შეწყვიტოს ეს შეურაცხმყოფელი ქმედებები და დააბრუნოს უკრაინელი ბავშვები“, – განაცხადა სახელმწიფო დეპარტამენტის პრესსპიკერმა.
ცნობისთვის, რუსეთის ბავშვთა უფლებების კომისარმა, მარია ლვოვა-ბელოვამ თავის მოხსენებაში აღიარა, რომ რუსეთმა თავის ტერიტორიაზე დაახლოებით 4,8 მილიონი უკრაინელის დეპორტაცია განახორციელა, რომელთაგან 700 000-ზე მეტი ბავშვია.
კომენტარები