“სახე ჰქონდა ალეწილი, ნამტირალევი, გარტყმული ჰქონდა სახეში, დაჯდა ტირილით, – იხსენებს ბავშვის დედა” – ვახო სანაია

ჟურნალისტი, ვახო სანაია:

“2019 წელს ,,მწვანე სკოლის” შენობის კედელზე წარწერა გაჩნდა.

15 წლის ლუკა სირაძეს ამ წარწერის გაკეთებაში ადანაშაულებდნენ.

პოლიციის განყოფილებაში ბავშვისგან აღიარებითი ჩვენების იძულებით მოპოვებას ცდილობდნენ.

საიას ინფორმაციით, ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს.

ბავშვის დედა იხსენებს : ჩოლოიანი ეუბნებოდა, კისერს მოგიგრეხო, კიდევ 4-5 ადამიანი აშანტაჟებდა.

ისევ ბავშვის დედა იხსენებს : გამოვიდა […] მილიციის უფროსის მოადგილე რევაზ მამასახლისი და თავისთან შეიყვანა ლუკა კაბინეტში. რომ გამოვიდა, სახე ჰქონდა ალეწილი, ნამტირალევი, არ მომეწონა სახე, ნამდვილად ვიტყვი, რომ გარტყმული ჰქონდა სახეში, მაგრამ არ თქვა – კაპეზეთი დამემუქრაო. მოვიდა, დაჯდა ტირილით “.

გარკვეული პერიოდი ბიჭი მარტო აღმოჩნდა პოლიციელთა გარემოცვაში.

დაკითხვის შემდეგ, 2019 წლის 11 დეკემბერს, ლუკა სირაძე კორპუსის სახურავიდან გადმოხტა.

ლუკა სირაძის გადარჩენა ვერ მოხერხდა. 17 დეკემბერს ბიჭს გული გაუჩერდა და დაიღუპა.

დააკავეს მხოლოდ გამომძიებელი მარიანა ჩოლოიანი, სხვა არავინ. ჩოლოიანს სასჯელი ბოლომდე არ მოუხდია. ის უდოს კომისიის დახმარებით ციხიდან გამოუშვეს.

ასე გადაეფარა სისტემა თავისიანებს. სირაძის თვითმკვლელობაში დამნაშავეები კი თავისუფალი არიან.”