საკრებულოს ყოფილი დეპუტატი, სოსო მანჯავიძე:
“ისევ ის ინდური ლეგენდა გამახსენდა დღევანდელი ვითარების მაყურებელს.
ერთხელ ერთ ქალაქს შავი ჭირის დემონი მოადგა.
ქალაქს მფარველი წმინდანი ჰყავდა და დემონს მოელაპარაკა, რომ ქალაქი მთლიანად არ გაენადგურებინა და მხოლოდ განსაზღვრული ხარკი აეღო.
შავმა ჭირმა ქალაქს მუსრი გაავლო, რის გამოც ქალაქის მფარველმა დემონი ფიცის გატეხვაში დაადანაშაულა და შეკვრას უპირებდა.
“მე ფიცი არ დამირღვევია”- თავი გაიმართლა დემონმა. მე იმდენი და ისინი წავიყვანე, რაზედაც შევთანხმდით, ხოლო დანარჩენები შიშმა მოკლა.”
“შიში ვერ იხსნის სიკვდილსა, ცუდია დაღრეჯილობაო”-გვეუბნება რუსთაველი.
” ჭირი გარბის მხიარულებისაგან და ეწებება ჭმუნვას და კაეშანს”-ამბობდა აბუ ალი იბნ-სინა.
ათასი ექსპერიმენტით არის დამტკიცებული, რომ სტრესი აქვეითებს იმუნიტეტს. ფსიქიკა უზარმაზარ ენერგიას ხარჯავს შიშზე და ამის გამო ორგანიზმს უბრალოდ ენერგია არ ყოფნის გამოჯანმრთელებისათვის.
ისიც ცნობილია, რომ იმედი და პოზიტიური განწყობილება მკვეთრად ზრდის ავადმყოფების, მათ შორის, ონკოლოგიურების, გამოჯანმრთელების შანსებს.
არის კიდევ ისეთი ფენომენი, როგორიცაა, კოგნიტიურ-საინფორმაციო გამრუდება, რომელსაც ასევე იწვევს შიში-ადამიანი ფიქსირდება შიშზე და ყველაფერში მისგან გამომდინარე მიზეზ-შედეგობრივ კავშირებს ხედავს.
საოცარია ასეთი ადამიანების სამყარო-ის შედგება მტრული ვირუსებისგან, რომლებიც მას ყველგან დასდევენ-ტყეში, ზღვაზე, ჭამისას და ძილისას, ხოლო გარშემო ყველა მათი გავრცელების წყაროა.
შიშზე ფიქსაციის შედეგად ადამიანი კარგავს ლოგიკური აზროვნების უნარს და კონტროლს საკუთარ გამოვლინებებზე.
ახლა ჩვენს ეპიდემიოლოგებს მინდა მივმართო, განსაკუთრებით კი – ამირან გამყრელიძეს.
სახე გაასწორეთ და ხალხს ნუ ზაფრავთ. ნუ ხატავთ გამოუვალი ჩიხის სურათს. ყოველი თქვენი გამოსვლა ამძიმებს სიტუაციას, რომელიც ძალიან მაგონებს მუტფილმ ,, მონსტრების კორპორაციას”, სადაც მონსტრების შრომა მათ მიერ გამოწვეული ბავშვების შიშის რაოდენობით ფასდება.”
კომენტარები