საქართველოს ახალგაზრდა იურისტთა ასოციაცია (საია) აქტივისტ ნინო დათაშვილის დაკავებას ეხმაურება და წერს, რომ აღკვეთის ღონისძიების სახით მის წინააღმდეგ გამოყენებული პატიმრობა სასამართლოს ბრალდებულის დასასჯელად არ უნდა გამოეყენებინა.
მათივე თქმით, საიასთვის უცნობია დაიწყო თუ არა გამოძიება ან რაიმე სახის შიდა მოკვლევა მანდატურის სამსახურის ცალკეული თანამშრომლების მხრიდან ბოლო პერიოდში აქციების კონტექსტში დაკავებული დემონსტრანტების პროცესებზე დასწრების მიზნებისთვის სასამართლოში მყოფი მოქალაქეების მიმართ გამოვლენილ ძალადობრივ ფაქტებზე.
“მოსამართლე ეკა ბარბაქაძემ აქტივისტ ნინო დათაშვილს აღკვეთის ღონისძიების სახით პატიმრობა შეუფარდა. პროკურატურამ ნინო დათაშვილს ბრალი სისხლის სამართლის კოდექსის 353-ე სეკუნდა მუხლის მე-3 ნაწილით წარუდგინა. სხვა რეპრესიულ საკანონმდებლო ცვლილებებთან ერთად, აღნიშნული მუხლი 2025 წლის 6 თებერვლის ცვლილებებით დაემატა საქართველოს სისხლის სამართლის კოდექსს.
აღკვეთის ღონისძიების გამოყენება მიმართული არ უნდა იყოს ბრალდებულის დასჯისკენ. სასამართლომ, უნდა იმსჯელოს ნაკლებად შემზღუდავი აღკვეთის ღონისძიების გამოყენების მიზანშეწონილობის საკითხზე და მხოლოდ მაშინ, როდესაც ვერცერთი სხვა აღკვეთის ღონისძიების სახე ვერ უზრუნველყოფს ბრალდებულის სათანადო ქცევას, საგამონაკლისოდ, გამოიყენოს პატიმრობა”, – წერს საია.
სამოქალაქო განათლების პედაგოგი, აქტივისტი ნინო დათაშვილი 21 ივნისიდან „ქართული ოცნების“ ტყვეთა და სინდისის პატიმრების რიგებში უკვე ოფიციალურად გაამწესეს. სისტემამ ამჯერად გადაწყვეტილება მორიგი ახალდანიშნული მოსამართლის, ეკა ბარბაქაძის პირით მიიღო.
ნინო დათაშვილი 20 ივნისს სასამართლოს მანდატურზე თავდასხმის ბრალდებით დააკავეს.
„გამოძიებით დადგინდა, რომ მიმდინარე წლის 9 ივნისს, თბილისის საქალაქო სასამართლოში ბრალდებული არ დაემორჩილა მანდატურის თანამშრომლებს და ერთ-ერთ მათგანს ფიზიკური შეურაცხყოფა მიაყენა. საქმეზე ჩატარებული საგამოძიებო მოქმედებების შედეგად, სამართალდამცველებმა ნ.დ. დააკავეს. გამოძიება საქართველოს სისხლის სამართლის კოდექსის 353-ე სეკუნდა მუხლის მე-3 ნაწილით მიმდინარეობს“, — ნათქვამია შინაგან საქმეთა სამინისტროს განცხადებაში.
კომენტარები