პოლიტიკოსი, დავით ზურაბიშვილი:
“ვინც მეტროთი ხშირად მგზავრობს, ალბათ არაერთხელ უნახავს ვაგონში შემოსული შუახნის კაცი, რომელიც ყიდის მართლმადიდებლურ კალენდარს. ტიპს აქვს კარგად დაყენებული, დიქტორის ხმა, რომელიც მთელი ვაგონის გასაგონად გვიხსნის, რომ კალენდარზე აღნიშნულია ყველა მართლმადიდებლური დღესასწაული და კალენდრის ფასია ერთი ლარი.
ჰოდა გუშინ მეტროში ეს ტიპი კვლავ შემოვიდა, ჩვეულებისამებრ აღწერა მართლმადიდებლური კალენდრის მიმზიდველი თავისებურებები და რომ გამოაცხადა ფასი ერთი ლარიო, ვიფიქრე მორჩა, მაგრამ ნურას უკაცრავად, თავისი დაყენებული ხმით გააგრძელა:
– კიდევ გვაქვს ჩვეულებრივი კალენდარი ხვიჩა კვარაცხელიას ფოტოთი. ფასი ასევე ერთი ლარი.
არ ვიცი სხვაგან როგორ იყო, მაგრამ იმ ვაგონში ეს მეორე კალენდარი უფრო მეტმა იყიდა.
თავისთავად კი არაფერი, მაგრამ ერთგვარი სიმპტომივითაა ეს –
ფეხბურთის კულტი ბრუნდება საქართველოში.”
კომენტარები