საბერძნეთის პოლიციამ, 3 აპრილს, ომონიის ტერიტორიაზე პრორუსულ ავტოკოლონაში მონაწილე პირებზე თავდასხმის ბრალდებით 2 ქართველი კაცი დააკავა. ინფორმაციას ბერძნული მედია ავრცელებს.
დაკავებულ საქართველოს ორ მოქალაქეს, ბრალად ედებათ: მკვლელობის მცდელობა, სახელმწიფო სიმბოლოს შეურაცხყოფა, ასევე რასისტული ხასიათის დანაშაული, სხვისი ქონების დაზიანება, დაუმორჩილებლობა და უკანონოდ იარაღის ტარება.
პოლიციის მიერ გავრცელებული ინფორმაციით, ბრალდებული საქართველოს მოქალაქეები, ომონიის ტერიტორიაზე სხვა თანამზრახველებთან ერთად თავს დაესხნენ პრორუსული კოლექტივების ავტოკოლონას, რის შედეგადაც მათ მატერიალური ზიანი მიაყენეს ორ მანქანას და დააშავეს ორი ადამიანი. როგორც ცნობილია დაშავებული ორი მოქალაქიდან ერთ-ერთი ბერძენია.
ბერძნული მედიის ცნობით, გამოძიების ფარგლებში, საბერძნეთის პოლიციამ, ბრალდებულების სახლში ჩხრეკა ჩაატარა, რის შედეგადაც ნაპოვნი და ამოღებული იქნა ის ტანსაცმელი, რომელიც მათ თავდასხმის დღეს ეცვათ, ასევე ორი დანა და ცეცხლსასროლი იარაღი.
დაკავებული საქართველოს ორი მოქალაქე გადაყვანილია პროკურატურაში.
საბერძნეთის პოლიცია დანარჩენი დამნაშავეების იდენტიფიცირებისა და ადგილსამყოფლის დადგენის მიზნით გამოძიებას აგრძელებს.
კომენტარები