სამართალდამცველებმა თბილისში, ჟვანიას ქუჩაზე მომხდარი დანაშაულის ფაქტზე, ბიზნესმენ თამაზ ელიზბარაშვილის ვაჟი, გურამ ელიზბარაშვილი დააკავეს.
“პრაიმტაიმის“ ინფორმაციით, სროლა საბავშვო ბაღთან მოხდა. მშობელი, რომელმაც ბავშვი ბაღში დატოვა, სიტყვიერი კონფლიქტის შემდეგ, ცეცხლსასროლი იარაღით არის დაჭრილი. ის კლინიკაში გადაიყვანეს.
დაზარალებული უცხო ქვეყნის მოქალაქეა. ბრალდებულ გურამ ელიზბარაშვილს პოლიციის განყოფილებაში დაკითხვის შემდეგ ბრალი ოფიციალურად წარედგინა.
ფაქტზე გამოძიება ჯანმრთელობის განზრახ დაზიანებისა და იარაღის უკანონო შეძენა-შენახვა-ტარების მუხლით მიმდინარეობს.
თამაზ ელიზბარაშვილი ამტკიცებს, რომ ძაღლთან დაკავშირებით მომხდარი უთანხმოება ორმხრივ სროლაში გადაიზარდა და მისი შვილიც ფეხშია დაჭრილი, იუწყება „ტვ პირველი“:
გამოვთქვიო საყვედური, აქ რატომ გამოგყავს ძაღლიო, რატომ ასეირნებ სკვერში ძაღლსო, ჩემს შვილს უთქვია, რას ჰქვია, ძაღლია და სკვერში უნდა გამოვიყვანო, აბა, სად წავიყვანო, სახლში ხომ არ მოისაქმებსო და შესაბამისი ცელოფანით იღებს მოსაქმებულს და აგდებს სანაგვე ურნაში. ამას დაუწყია გინება, ჩხუბი და ფეხი მოუქნევია ძაღლისთვის, ბუნებრივია, ჩემმა შვილმა დაიცვა ჩვენი ოჯახის ოთხფეხა წევრი. მერე რა მოხდა, როგორ მოხდა, ჩემი შვილი ფეხში ტყვიითაა დაჭრილი, ბუნებრივია, ორმხრივი სროლა იყო. კამერები ამოიღეს, იმ უცხოელს იარაღი ჰქონდა, მანქანაში ედო, მანქანით იყო მისული,” – ამბობს თამაზ ელიზბარაშვილი.
კომენტარები