“სააკაშვილს რეჟიმს არ უკადრია ის, რაც ამ ხელისუფლებამ იკადრა” – დიტო ჩუბინიძის და

ასავალ-დასავალის ჟურნალისტის, დიტო ჩუბინიძის და, ნატო ჩუბინიძე, ტვ პირველთან, ძმის დაკავებაზე საუბრისას, ამბობს:

სამშობლოს ღალატის მუხლი წაუყენეს. ეს ყველაფერი გარდაცვლილ ლაზარე ჯორბენაძესთან ჩაწერილ ინტერვიუს უკავშირდება. ალბათ ჩემი ძმის ინტერვიუები ძალიან გაეჩხირა ამ ხელისუფლებას ყელში და ამით უნდათ ჩემი ძმა გააჩერონ. ამას მე აღვიქვამ შურისძიებად. ჩემი ძმა ამ საქმეში არის მხოლოდ ჟურნალისტი, რომელმაც რესპოდენტისგან აიღო ინტერვიუ. მას არავითარი კავშირი არ აქვს ღარიბაშვილთან – ნანახიც არ ჰყავს. როგორც ჩანს რაღაც ისე არ არის, როგორც უნდა იყოს და ამიტომ მოიშორეს. კობახიძის მიმართ სვამდა კითხვას და თუ ეს ასე არ არის, რასაც ლაზარე ჯორბენაძე ამბობდა, მაშინ გაასაჯაროოს სახელმწიფომ ის დოკუმენტი, რომლითაც მთელ ქართველ ხალხს აჩვენებს, რომ დავით გარეჯის ის სადაო ტერიტორიები ისევ ჩვენია. ამ ხელისუფელბის მოსვლაში ასე თუ ისე ჩემი ძმაც იღებდა მონაწილეობას, იმიტომ რომ  სააკაშვილის მმართველობის პერიოდში ანალოგიურ დევნებს განიცდიდა, მაგრამ ახლა უნდა ვთქვა ის, რაც არასოდეს არ მითქვამს და თუ ვიტყოდი არ მეგონა, სააკაშვილს რეჟიმს ის არ უკადრებია, რაც იკადრა ამ დღევანდელმა ხელისუფლებამ. სამარცხვინო ფაქტია” 

„ასავალ-დასავალის“ ჟურნალისტი, დიტო ჩუბინიძე დღეს სამშობლოს ღალატის, საბოტაჟის ბრალდებით  დააკავეს.

საგამოძიებო უწყება ჩუბინიძეს საქართველო-აზერბაიჯანის საზღვაზრთან მდებარე დავით-გარეჯის სამონასტრო კომპლექსის შესახებ ცრუ ინფორმაციის გავრცელებას ედავება.

პროკურატურაში თქვეს, რომ „2026 წლის თებერვლიდან დიტო ჩუბინიძე სხვადასხვა მედიასაშუალებისა და სოციალური პლატფორმების გამოყენებით სისტემატურად ახორციელებს ცრუ და დეზინფორმაციულ ცნობებს”. მას 4-წლიანი პატიმრობა ემუქრება.