ანი დვალიშვილი
რამდენიც არ უნდა ამტკიცოს ხელისუფლებამ, რომ მიხეილ სააკაშვილის ჩამოსვლის არ ეშინია, რეალურად, საქართველოს მესამე პრეზიდენტის გამოჩენა ჩვენს ქვეყანაში სერიოზულ პრობლემას შექმნის. დასამალი არავისთვისაა, რომ კონკრეტულად სააკაშვილს (და არა ნაციონალურ მოძრაობას) უამრავი მხარდამჭერი ჰყავს და მის დასაცავად ქუჩაში გამოსვლაც არ დაეზარებათ. ეს განსაკუთრებით ქვემო ქართლის რეგიონზე ითქმის, რომელიც აზერბაიჯანელი მოსახლეობით მჭიდროდ არის დასახლებული და აზერბაიჯანელების არც თუ მცირე ნაწილი მიშას დღემდე აღმერთებს. შიდა კვლევების მიხედვით, ქვემო ქართლის რეგიონში სერიოზული მოლოდინია იმისა, რომ სააკაშვილი მართლაც დაბრუნდება და მის დასახვედრად ემზადებიან.
სწორედ ეს არის მთავარი მიზეზი იმისა, რომ ხელისუფლებამ უკრაინაში დაკავებული მეგის ქარდავას ექსტრადაციის საქმე დააჩქარა. მთავრობა დაჩქარებული წესით აპირებს ქარდავას ჩამოყვანას და ციხეში გამწესებას, რაც სერიოზული მინიშნება იქნება იმაზე, რომ საქართველოში დაბრუნების შემთხვევაში, ციხე არც მიშას ასცდება. ამის მიუხედავად, ნაციონალური მოძრაობა აქტიურად ემზადება სააკაშვილის დასახვედრად და აქტივსაც აფრთხილებენ, რომ საჭიროების შემთხვევაში, სულ რაღაც ერთ დღეში უნდა მოხდეს მობილიზება და იმ ადგილზე მისვლა, საიდანაც სააკაშვილი შეეცდება საქართველოში შემოსვლას. ასეთად კი წითელი ხიდი და სარფის საბაჟო სახელდება. წითელ ხიდამდე ერთადერთ ვარიანტად სარფის საბაჟო განიხილებოდა, მაგრამ როგორც გვეუბნებიან, თურქეთის მთავრობისგან ნაციონალებმა ვერ მიიღეს იმის გარანტია, რომ თავის მხარეს გაატარებდნენ, ანუ სააკაშვილს ნეიტრალურ ზონაში შეუშვებდნენ. ასეთი დასტური ჯერჯერობით არც სომხურმა მხარემ გასცა, მაგრამ საქმე ის გახლავთ, რომ მათ არც უარი უთქვამთ. ნიკოლ პაშინიანის ვიზიტის დროს, ერთ-ერთი მთავარი განსახილველი თემა ესეც იყო, თუმცა, როგორც ჩვენი წყარო გვეუბნები, ირაკლი ღარიბაშვილმა ვერ მიიღო მყარი გარანტიები იმასთან დაკავშირებით, რომ სომხეთში სააკაშვილის ჩასვლის შემთხვევაშ, მას დააკავებენ და ქართულ მხარეს გადმოსცემენ.
„ერთი რამ ცხადია – მნიშვნელობა არ აქვს, საიდან მოადგება სააკაშვილი საქართველოს საზღვარს, იქ მოხდება მინიმუმ 50-70 ათასი ადამიანის მობილიზება და ხელისუფლებას კვლავ ძალის გამოყენება მოუწევს იმისთვის, რომ ამ ხალხს მიშა წაართვას. სწორედ რომ წაართვას, რადგან ისინი შეეცდებიან, სააკაშვილი სამართალდამცავებს არ დაანებონ. ამიტომ, იდეალური ვარიანტია, ის დააკავოს იმ ქვეყანამ, სადაც ჩაფრინდება, ან დააკავონ ნეიტრალურ ზონაში ქართველმა სამართალდამცავებმა და სპცეავტომობილით გადაიყვანონ სასჯელაღსრულების დაწესებულებაში“,-გვეუბნება ჩვენი წყარო.
აქვე გეტყვით, რომ, ჩვენი ინფორმაციით, სააკაშვილს დაპირების მიუხედავად, ბოლომდე მიღებული არ აქვს გადაწყვეტილება და საუკეთესო შემთხვეევაში, ის შესაძლოა, რომელიმე მეზობელ ქვაყანაში ჩავიდეს. მას ჯერჯერობით ვერავინ აძლევს იმის გარანტიას, რომ საქართველოს საზღვრის კვეთის შემთხვევაში, არ დააკავებენ.
კომენტარები