“სააკაშვილმა მოითხოვა შეხვედრა, ორდერი მაქვს” – რატომ არ შეუშვეს გელბახიანი სააკაშვილთან?

საქართველოს მესამე პრეზიდენტ მიხეილ სააკაშვილთან შესახვედრად რუსთავის ციხესთან ადვოკატი ვალერი გელბახიანი მივიდა, თუმცა სასჯელაღსრულების მე-12 დაწესებულებაში ის PCR-ტესტის პასუხის არქონის გამო არ შეუშვეს.

როგორც გელბახიანმა ჟურნალისტებთან განაცხადა, მიხეილ სააკაშვილმა თავად მოითხოვა მასთან შეხვედრა.

“მე უპირველესად ვარ ადვოკატი და ალბათ, ჩემთან ან მასთან მიმართებაში რაღაც საკითხი აინტერესებს, მე ამ შემთხვევაში, როგორც ადვოკატი შევდივარ, ორდერი მაქვს. ჯერ ალბათ სამართლებრივი პროცედურები არ დგას დღის წესრიგში, მაგრამ რაღაც მოლაპარაკება არის განზრახული. რადგან მან მოითხოვა, მე ვალდებული ვარ, როგორც ადვოკატი რომ შევიდე, გავარკვიო სიტუაცია და ამის შემდეგ მივიღებ გადაწყვეტილებას რა სახის მომსახურება უნდა გავუწიო,” – განაცხადა გელბახიანმა.