“ხალხის ძალის” ერთ–ერთი ლიდერი, დავით ქართველიშვილი:
სააკაშვილის “შეკვეთილი აღსასრულის” ქრონიკა იმდენად გამჭირვალედ მიმდინარეობს, რომ ამის ვერ შემჩნევა არანაირად არ გამოდის. პატიმარი გამოაცხადეს “მოწამლულად”, მის ორგანიზმში უკვე აღმოაჩინეს “აქამდე უცნობი” და სკოლის მერხიდან – ნაცნობი ქიმიური ნივთიერებები. ზოგს გაახსენდა, რომ იგი “პუტინის პატიმარია” და “ნოვიჩოკი” და “პოლონიუმიც” მიამატეს. არანაირი მნიშვნელობა არა აქვს, რომ აღნიშნული ბოდვა ბუნებაში არსებული ყველა ტიპის მეცნიერული ექსპერიმენტალურ-პრაქტიკული ხერხებით არ დასტურდება – ბელადი კონკრეტული განზრახვით გამოაცხადეს უკვე “მოწამვლის გზით სიკვდილამდე მისულად” და განმცხადებლის წრეში, ეს განაჩენი გადახედვას არ ექვემდებარება.
ამ განაჩენს ელოდებიან თბილისში, ამას ელოდებიან კიევში (გავიხსენოთ თუნდაც არესტოვიჩის მიერ გაჟღერებული მოლოდინები) – არაა გამორიცხული, ამ სცენარის შესაძლო განვითარების მსურველთა გეოგრაფია უფრო ფართო იყოს. ერთადერთი რამ არ მესმის – ნუთუ “მიშიკოს” უახლოეს ადამიანებს: დედას, შვილებს, ცოლებს – ეს არ ესმით? არ ესმით – რომ “საერთაშორისო პროექტისთვის” ამ ეტაპზე ცოცხალ “მიშიკოზე” უფრო მომგებიანია, მისი საქართველოდან ჰიპოტეტური გაყვანის შემთხვევაში, მისი სულ მოკლე პერიოდში – რეალური მოწამვლით მოკვდინება, რამეთუ “მოწამვლის” ფაქტი უკვე დასახელდა, მოახლოვებული “სიკვდილი” დაანონსდა და “მკვლელი” – გამოცხადდა.
“მიშიკოსთან” გმირული დამშვიდობება, მისგან მეწამეობრივად აღსრულებულის ხატის შექმნა, მისი ციხიდან – “წმიდათა დასში” შეყვანის უმოკლესი გზაა, სადაც გაბათილდება არა თუ პირადი ცოდვები, არამედ სრულ დავიწყება-რეაბილიტირებას მიეცემა მისი “მკვლელების” მიერ ის რაღაც “სისხლიან რეჟიმად” შერაცხული ქვეყნის ისტორიის მონაკვეთი, რომელიც “გმირ-მოწამის” ნათელ სახელთან იყო გაიგივებული. დღეს ცოცხალ “მიშიკოზე” უცრო ტრენდული და პოლიტიკური მარკეტინგის თვალსაზრისით – მომგებიანია “ნაწამები, მოწამლული მოწამე მიშიკო”, როგორც მისი “მკვლელების” ხელისუფლებიდან მოშორების უმოკლესი გზა, “მიშიკოს” რეალური მკვლელების ქვეყნის მართვის სადავეებთან დაბრუნების მიზნით.
რატომ არ ესმის სააკაშვილის უახლოეს გარემოცვას, ვისაც წესით მართლაც უყვარს დღევანდელი იუბილარი, რომ ერთადერთი ადგილი, სადაც მის სიცოცხლეს საფრთხე არ ემუქრება – არის საქართველოს პენიტენციური სისტემა. რომ ერთადერთი ძალა, ვის ინტერესებშიც შედის ცოცხალი და ჯანმრთელი პატიმარი – არის მოქმედი ხელისუფლება. როგორ შეიძლება დედას, შვილებს, ცოლებს – არ ესმოდეს ან ვერ იმჩნევდნენ სააკაშვილის ამ “შეკვეთილი აღსასრულის” გამჭირვალე და გასაგებ ნიშნებს?
ამ დღეებში თავში მიტრიალებს აგატა კრისტის “მკვლელობა აღმოსავლეთ ექსპრესში” ეკრანიზაცია, რომლის ძირითადი სიუჟეტი ვითარდება კოლექტიურად განხორციელებული მკვლელობის ირგვლივ, სადაც მსხვერპლს დედამიწის ზურგზე არც ერთი კეთილიმოსურნე აღარა ჰყავს. მე არ ვარ იურისტი, მაგრამ ნუთუ არ არსებობს კოდექსში არც ერთი მუხლი, რომლითაც გამოცხადებულ “მკვლელობაზე” განზრახ დამახინჯებული და დაუდასტურებელი ინფორმაციის საჯაროდ გამოტანა, რომელიც ცრუ-მონაცემებს მოიცავს “მკვლელობის” ჩამდენზე, “მკვლელობის” იარაღზე და “მკვლელობის” ცრუ-მოტივაციაზე – კანონით ისჯებოდეს?
კომენტარები