იუსტიციის მინისტრი რატი ბრეგაძე EPP-ს პოლიტიკურმა ასამბლეის მიერ მიღებულ რეზოლუციას გამოეხმაურა, სადაც ჩანაწერია გაკეთებული მიხეილ სააკაშვილთან დაკავშირებით და სადაც მთავრობას მესამე პრეზიდენტის დაუყოვნებლივ გათავისუფლებისკენ მოუწოდებენ.
„მსჯავრდებულ სააკაშვილთან დაკავშირებით არაერთხელ გვითქვამს, რომ ჩვენ ვართ სამართლის წინაშე აბსოლუტურად მართლები. ეს დადასტურდა, როგორც საქართველოში, ქართული სასამართლოების დონეზე, ასევე სტრასბურგის სასამართლოს გადაწყვეტილებითაც ნათლად გამოჩნდა, რომ სახელმწიფო აკეთებს ყველაფერს იმისთვის, რომ ამ ადამიანის ჯანმრთელობის უფლება იყოს სრულად დაცული.
როგორც მოგეხსენებათ, მისი ჯანმრთელობის მდგომარეობა არის გაუმჯობესებული, რითიც ჩვენ ვართ ძალიან მოხარულები და როდესაც იქნება ექიმების შესაბამისი რეკომენდაცია, ის იქნება გადაყვანილი პენიტენციურ დაწესებულებაში.
რაც შეეხება ამ რეზოლუციის შეფასებას, მე ყველას მოვუწოდებდი, რომ იმოქმედონ სამართლის მიხედვით, იმიტომ,რომ ჩვენ ვხელმძღვანელობთ მხოლოდ და მხოლოდ სამართლის ნორმებით და არ აპოლიტიკური აღქმებით. ჩვენ ვიხილეთ, რომ მთელი ის ისტერიული კამპანია, რაც ამ კონკრეტული მსჯავრდებულის მიმართ მიმდინარეობდა, მათ შორის საერთაშორისო მედიაში, იყო დაფინანსებული, ამაში იყო თანხა გადახდილი და ამერიკის იუსტიციის დეპარტამენტის ვებგვერდზე გამოქვეყნებული ინფორმაცია ვიხილეთ და ვნახეთ, თუ რაში იხდიდნენ ფულს, მათ შორის იმაში, რომ საქართველოს წინააღმდეგ ყოფილიყო მიღებული სხვადასხვა ტიპის რეზოლუციები, დაერწმუნებინათ კონგრესმენები, რომ საქართველო დაესანქცირებინათ. ამ ადამიანებთან გვაქვს საქმე, როდესაც ვსაუბრობთ მსჯავრდებულ სააკაშვილზე და მის მხარდამჭერებზე – ეს არიან ადამიანების ის ჯგუფი, რომელიც ყველაფერს აკეთებს საკუთარი ვიწრო პოლიტიკური ინტერესების დასაკმაყოფილებლად და ისინი მზად არიან იმაზე, რომ დააზიანონ სახელმწიფო,“ – ამბობს ბრეგაძე.
კომენტარები