სააკაშვილის ადვოკატის ტაქტიკა ენმ-ს ფორმალურმა თავმჯდომარემ, ნიკა მელიამ გასცა – კობახიძე

მარტივი ტაქტიკური მანევრი – ასე უწოდებს „ქართული ოცნების“ თავმჯდომარე, ირაკლი კობახიძე მიხეილ სააკაშვილის ქართული პოლიტიკიდან შესაძლო წასვლასთან დაკავშირებით გავრცელებულ ინფორმაციას.

კობახიძის თქმით,  საზოგადოება მიხეილ სააკაშვილის საზღვარგარეთ სამკურნალოდ გაშვების თემებით დაღალა.

“საზოგადოება დაიღალა ამ ყველაფერზე საუბრით, საქართველოში არის 9 500 პატიმარი, 9 500 პატიმარი იხდის სასჯელს და ანალოგიური მიდგომა უნდა იყოს ნებისმიერი პატიმრის მიმართ“, – განაცხადა კობახიძემ.

მისივე თქმით, მესამე პრეზიდენტის ადვოკატის ტაქტიკა, ენმ-ს თავმჯდომარემ, ნიკა მელიამ გასცა.

„ნაცმოძრაობის“ ფორმალურმა თავმჯდომარემ, ნიკანორ მელიამ გათქვა რეალურად ტაქტიკა, რომელიც რეალურად აქვთ სააკაშვილის ადვოკატებს, ისინი საუბრობენ იმაზე, რომ სააკაშვილს აღარ სურს ქართული პოლიტიკა, აღარც საუბრობს ამაზე, არის მარტივი ტაქტიკური მანევრი, რაც გასაგებია ადვოკატების მხრიდან. საინტერესო ის არის, რატომ გათქვა ეს საიდუმლოება ფორმალურმა თავმჯდომარემ ნიკანორ მელიამ, ეს მეტყველებს იმაზე, რომ პარტიის შიგნით არის ძალიან სერიოზული განხეთქილება და რეალურად პოლარიზაცია არის „ნაცმოძრაობის“ შიგნით. “