“სააკაშვილი არის მძიმედ! შესაძლოა, მისი განცხადებები არ იყოს ბოლომდე ადეკვატური…” – გვარამია

“მთავარი არხის” დირექტორი, ნიკა გვარამია, ციხიდან გამოსვლის შემდეგ, სადაც ის სააკაშვილს შეხვდა, ამბობს:

“მიხეილ სააკაშვილმა მთხოვა გამეცხადებია, რომ ის არ იღებს მონაწილეობას აქციების დაგეგმვაში, ის არის ციხეში, მისი შესაძლებლობები შეზღუდულია. აქციების დაგეგმვაში, ლოჯისტიკაში და ა.შ. იგი მთლიანად ენდობა კოალიციას და აკეთებენ მისი შეხედულებით, ძალიან კარგად. მას შეუძლია გაამხნევოს ადამიანები და მოუწოდებს იაქტიურონ. მოხარული იქნება, თუ ექვსში, ხვალ ბევრი ადამიანის ხმას გაიგებს.

მინდა ვთხოვო ყველას, იქნება ეს ადვოკატი, ექიმი, თუ პარლამენტარი, მიხეილ სააკაშვილის განცხადებები წერილობით საკითხავად გამოტანილი არ იქნეს. ეს განცხადებები დაიდება მის ფეისბუქ გვერდზე და ამგვარად გაიგებს საზოგადოება. გთხოვთ, გაუწიეთ ანგარიში იმას, რომ ადამიანი არის მძიმე მგომარეობაში, იმ სერიოზულ კვალს ვგულისხმობ, რომელიც მის ფსიქიკას და აზროვნებას უკვე ეტყობა. დღეს კიდევ ერთხელ დავრწმუნდი ამაში, მდგომარეობა მეტად მძიმეა გუშინდელის შემდეგ – გთხოვთ, ამას გაუწიეთ ანგარიში და გაუწიეთ ანგარიში იმას, რომ შესაძლოა, მისი განცხადებები არ იყოს ბოლომდე ადეკვატური, ადგილი ჰქონდეს ურთიერთგამომრიცხავ განცხადებებს. კიდევ ერთხელ ვიმეორებ, მიხეილ სააკაშვილი არის მძიმედ!

ის რომ ფეხზე დგას (მინდა გითხრათ, უკვე ფეხზე დგომაც უჭირს, მართლა ყანყალებს ფეხზე რომ დგას და დაყვება ბევრად მეტი ბადრაგი რომ არ წაიქცეს), ეს არ ნიშნავს იმას, რომ იგი გონებრივად და ფსიქოლოგიურად ბოლომდე აკონტროლებს სიტუაციას. აღარ არის მიხეილ სააკაშვილი ამ მდგომარეობაში და ანგარიში გავუწიოთ ამას. ვისაუბროთ იმაზე, რასაც ვხედავთ. მიშა არასოდეს იტყვის, რომ ცუდადაა და უშველონ. მე პირადად, კარგს არაფერს ვხედავ, მძიმე სიტუაციაა.”