CNN-ის ცნობით, მათთან ინტერვიუს დროს რუსეთის ფედერალური უსაფრთხოების სამსახურის (ФСБ) ორმა ყოფილმა ჯაშუშმა აღიარა, რომ ისინი სპეციალური დავალების შესასრულებლად გარკვეული დროით საქართველოშიც იმყოფებოდნენ.
მედიის ცნობით, მიხაილ სოკოლოვი ჰყვება, რომ 2016 წელს, 19 წლის ასაკში რუსეთის კომუნისტურ პარტიას შეუერთდა. სწორედ მაშინ მოხვდა ФСБ-ს ყურადღების ქვეშ. რადგან იგი სავალდებულო სამხედრო სამსახურს არიდებდა თავს, პირობა წაუყენა- ან დათანხმდებოდა თანამშრომლობაზე, ან მოხვდებოდა ციხეში 2 წლით. სოკოლოვი თანამშრომლობას დათანხმდა. იგი ჰყვება, რომ 2017 წელს ალექსეი ნავალნის ანტიკორუფციულ მოძრაობიდანაც ინფორმაციას ФСБ-ს აწვდიდა.
მისივე თქმით, იგი ФСБ-მ საქართველოში გამოგზავნა დავალებით, რომ ეთვალთვალა და ინფორმაცია მოეგროვებინა საქართველოში მცხოვრებ და დასაქმებულ რუსეთის მოქალაქეებზე, რომლებიც რუსეთიდან რეპრესიებს გაექცნენ.
იგი ჰყვება რომ დავალებებს 5 წელი ასრულებდა.
მეორე ჯაშუში ვსევოლოდ ოსიპოვია. ის 2021 წელს, ალექსეი ნავალნის მხარდამჭერ აქციაზე დააკავეს, 19 წლის ასაკში და ჯაშუშობაზე დაითანხმეს. ჰყვება, რომ ისიც საქართველოში გამოგზავნეს, რათა თვალყური ედევნებინა რუსეთის მოქალაქეებისათვის და მათი შეხედულებებისთვის, განსაკუთრებით უკრაინის ომზე და იმაზე, თუ როგორ ეხმარებოდნენ სხვა ქვეყნები და არასამთავრობო ორგანიზაციები უკრაინელ ლტოლვილებს.
სოკოლოვი და ოსიპოვი ახლა ნიდერლანდებში ითხოვენ თავშესაფარს.
კომენტარები