რუსული კანონის პროპაგანდა დგას ორ მოკლე ფეხზე – დიღმელაშვილი

1. გამჭვირვალობა: დონორები და სამოქალაქო ორგანიზაციები არ ასაჯაროებენ დაფინანსებას.

2. სუვერენიტეტი: ადრე მოსკოვი გვიბრძანებდა, ახლა ბრიუსელი გვიბრძანებს.

მარტივი კონტრარგუმენტები:

1. დონორების დაფინანსება ისედაც გამჭვირვალეა: მიზნობრიობა როგორც წესი ქვეყნდება მიმღები ორგანიზაციის საიტზე, ამასთანავე არსებობს სპეციალურ რეესტრშიც.

ამასთან, თითოეული ტრანზაქციის შესახებ დაწვრილებით მოეხსენება შემოსავლების სამსახურს.

ბუნებრივია, ყოველთვის არის სივრცე მეტი გამჭვირვალობისთვის, თუმცა ამის მისაღწევად არ გჭირდება ვინმესთვის აგენტის დარქმევა, უკვე არსებული კანონმდებლობის გაფართოება უამისოდაც შეიძლება.

2. მოსკოვის და ბრუსელის შედარება, რუსებისა და დასავლეთის ერთი სიტყვით – უცხოებად მოხსენიება აჩვენებს, რომ ხელისუფლება მტერსა და მოყვარეს ვერ და არ არჩევს.

საბჭოთა კავშირში საქართველო თვითნებურად არ შესულა, საბჭოთა კავშირმა საქართველო დაიპყრო. ამ დანაშაულის შერბილება რუსობაა.

ევროკავშირში ჩვენ თვითნებურად შევდივართ, რაც ნიშნავს თანხმობას თამაშის საერთო ევროპულ წესებზე, რა თანხმობაც განაცხადეს გერმანიამ, საფრანგეთმა და სხვებმა.

რუსული კანონი ამ თამაშის წესებთან წინააღმდეგობაში მოდის. მივდივართ ევროპის ფეხბურთის ჩემპიონატზე და ვეუბნებით, ჩვენ ბურთს ხელით ვატარებთ, ჩვენი ხელია და რასაც გვინდა იმას ვიზამთ, სხეულის სუვერენიტეტს არ დავთმობთო. ისინი გვეუბნებიან, ჩვენ ეგრე არ ვთამაშობთო

(ფარა და ფრანგული კანონი მოაქვთ, რომელთაგან ა) არცერთი არ არქმევს ვინმეს აგენტს, განურჩევლად ორგანიზაციის საქმიანობისა; ბ) არ ათანასწორებს მტერს და მოყვარეს – რუსულ და ჩინურ გავლენეზეა ფოკუსირებული; გ) სამიზნეში არ იღებს არასამთავრობოებს; დ) არ გულისხმობს დანოსის საფუძველზე ორგანიზაციაში იუსტიციის სამინისტროს შესვლას და პირადი ინფორმაციის დაუფლებას. ასეთ რაღაცებს წინ გამოძიება და ორდერი უნდა უსწრებდეს და არა პავლიკ მოროზოვის ჟანრის ბელეტრისტიკა)

მოსკოვმა წაგვართვა დამოუკიდებლობა – მამულიც, ენაც, სარწმუნოებაც.

ამ დროს ევროკავშირი ყველა წევრს აძლევს ვეტოს უფლებას, რითიც ყველა პატარა “სუვერენიტეტდაკარგულ” ქვეყანას შეუძლია ამხელა სუპერძალის ნებისმიერი გადაწყვეტილება გააჩეროს და ამის მაგალითებიც გვინახავს.

ევროკავშირში დაცულია ყველა ქვეყნის კულტურა და ეროვნული იდენტობა, განსხვავებით მოსკოვის სატელიტებისგან, რომლებიც გაჭრილი ვაშლებით ემსგავსებიან ერთმანეთს.

ჯერ წევრი არ ვართ და მივიღეთ მილიარდობით დახმარება იმისათვის, რომ აღგვედგინა და გაგვეძლიერებინა რაც რუსეთმა წაგვართვა.

საქართველოს სუვერენიტეტის მტერი არის ოფიციალური მოსკოვი, რომელიც რამდენჯერმე გვეომა, დაგვიპყრო და ერის საუკეთესო ნაწილი გაგვიჟლიტა და არა ოფიციალური ბრუსელი, რომელსაც არასოდეს არ დაუპყრია, არც თავს დასხმია.

ჩვენი სუვერენიტეტისთვის მთავარი საფრთხე არის დასავლეთისგან იზოლაცია და რუსეთის მუდმივი და უწყვეტი აგრესიის პირისპირ მარტო დარჩენა, რასაც რუსული კანონი ხელს უწყობს.