“რუსი ქალი გემიდან რომ გვაჩვენებდა, ხომ არ გარეკეთო, იცით ეს რას ნიშნავს?” – ბექა კობახიძე

ილიას სახელმწიფო უნივერსიტეტის თანამედროვე საქართველოს ისტორიის სამაგისტრო პროგრამის თანახელმძღვანელი, პროფესორი ბექა კობახიძე:

“რუსული გემის შემოსვლას ჩვენი საზოგადოების თავმოყვარე ნაწილი ემოციურად შეხვდა. ამ ამბავში სასიხარულო მხოლოდ ეს მომენტია.

არ ვიცი ამის დრო არის თუ არა, მაგრამ შინაარსობრივი ნაწილიდან ჩემი ორი დაკვირვება მინდა გამოვყო:

1. რუსი ქალი გემიდან რომ გვაჩვენებდა, ხომ არ გარეკეთო, იცით ეს რას ნიშნავს?
რუსულ საზოგადოებაში მიზერული ცოდნა (ინფორმაციულ დონეზე) და განცდაც არ არის იმისა თუ რა გაუკეთეს ამ ქვეყანას. გულწრფელად არ ესმით რა გვაბრაზებს და გიჟები ვგონივართ.
ებრაელი ხალხი გაზის კამერებში რომ იგუდებოდა და ეს იმდროინდელი გერმანელისთვის არაფერს ნიშნავდა, ეგ გამახსენდა.
რუსულ იმპერიალიზმს ვერაფერი დაასრულებს, გარდა ამ ხალხის სავალდებულო განათლება-გადამზადებისა. ის ვერ დასრულდება, სანამ რუსული კოლონიალიზმის ისტორიას რუსეთის სკოლებში სავალდებულოდ არ ასწავლიან. რა პერსპექტივა აქვს ჩვენს სიცოცხლეში ამას არ ვიცი და დავდარდიანდი;

2. ქვემოთ ჩამოსულმა რუსმა ქალმა ხომ ილაპარაკა ბევრი სითახსირე და იქვე დაამატა, რომ მეო აფხაზეთში ბევრჯერ ვიყავი და ვიციო. ეს კამერების წინ თქვა.
შემდეგ ალბათ ჩასკდა ბათუმის რომელიმე რესტორანში და მშვიდად წავიდა.
კანონი ოკუპირებული ტერიტორიების შესახებ გაუქმებულია და რუსები კანონზე მაღლა დგანან. ეს რომ ასე ხდება, ჩვენი სუვერენიტეტიც გაუქმებულია.

ამის პასუხად, მმართველი პარტიის ლიდერმა ირაკლი კობახიძემ განაცხადა, რომ ჩვენ ვართ ქაჯები.

თქვენთან ერთად, მეც ძალიან გაბრაზებული ვარ.”