„რუსეთის გარედან დამარცხება შეუძლებელია, მისი დანგრევა მხოლოდ შიგნიდან შეიძლება. სწორედ ეს მოხდა პირველი მსოფლიო ომის შემდეგ და 1990-იან წლებში“, – ამის შესახებ რუსეთის პრეზიდენტმა ვლადიმერ პუტინმა წლის შემაჯამებელ პრესკონფერენციაზე ალექსეი ნავალნის საკითხის კომენტირებისას განაცხადა. ინფორმაციას paperpaper.ru ავრცელებს.
„ვინ დაანგრია რუსეთი? მათ, ვინც უცხოთა ინტერესებს ემსახურებოდა. ჩვენი ოპონენტები საუკუნეების განმავლობაში ამბობდნენ, რომ გარედან რუსეთის დამარცხება შეუძლებელია, მისი დანგრევა მხოლოდ შიგნიდან შეიძლება“, – განაცხადა რუსეთის პრეზიდენტმა.
პუტინმა ალექსეი ნავალნის უწოდა „ადამიანი, რომელიც თითქოს მოწამლეს“.
„ჩვენ არაერთხელ გავუგზავნეთ „ნოვიჩოკის“ თუ რაც ჰქვია, მაგის შესახებ ოფიციალური განაცხადები საფრანგეთის პრეზიდენტს და გერმანიის კანცლერს. გვჭირდებოდა ოფიციალური საფუძველი, რომ სისხლის სამართლის საქმე აღძრულიყო. პასუხი – ნული. ასე რომ არ გვინდა ეს ტყუილი ლაპარაკი“, – განაცხადა პუტინმა.
რუსეთის პრეზიდენტი, ასევე, შეეხო „უცხოური აგენტების“ შესახებ კანონს, რომელიც რუსეთის საზოგადოებაში აქტიურად განიხილება. ეს კანონი ჩვენ არ მოვიფიქრეთ.
„რუსეთში ის ბევრად ლიბერალურია, ვიდრე მაგალითად, აშშ-ში, სადაც ის ჯერ კიდევ 1930-იან წლებში მიიღეს, მაგრამ დღემდე მოქმედებს. საზღვარგარეთ უცხოურ აგენტებს სისხლის სამართლის პასუხისმგებლობა ემუქრებათ, რუსეთში კი ასე არ არის. რუსეთში უცხოურ აგენტებს საქმიანობას არავინ უკრძალავს, მათ უბრალოდ დაფინანსების წყაროების შესახებ ინფორმაცია უნდა მიაწოდონ შესაბამის ორგანოებს“, – ამბობს პუტინი.
კომენტარები