ლევან ჯავახიშვილი
„ალიას“ ესაუბრება პოლიტიკოსი, კახა მიქაია.
– პოლიტიკური პროცესი ისევ ჩიხში მოექცა. მე ვატყობ, ხალხს სხვა გზას არ უტოვებს ხელისუფლება, გარდა სპონტანური არეულობისა. თქვენ რას იტყვით?
– მე ვერ ვიწინასწარმეტყველებ, როგორ წავა პროცესები. ეს ბევრ რამეზეა დამოკიდებული. ამასწინათ დავწერე „ფეისბუქზე“, იმედგაცრუებები, ასეთი შემთხვევები, როგორიც იყო ბოლოს, ამ 6 თვის განმავლობაში მეტი და მეტი იქნება. ამიტომ, საჭიროა სიმტკიცე და ამ პროტესტის შენარჩუნება. პროცესის მიმდინარეობის დროს არარელევანტურად მიმაჩნია ისეთი ეგზოტიკური ფიგურის, როგორიც ღარიბაშვილია, გადადგომის მოთხოვნა. ღარიბაშვილზე, კობახიძეზე და მათნაირებზე საზოგადოებამ დრო არ უნდა დაკარგოს, რადგან ხელისუფლებას წარმოადგენს ერთი კაცი და სხვა დანარჩენი მისი მარიონეტია. თუ ბიძინა ივანიშვილი შეძლებს ქართული საზოგადოების გადატეხვას და კრემლის ოცნებების აღსრულებას საქართველოში, მაშინ პირდაპირ ვამბობ: ქართული საზოგადოება არ ყოფილა ევროპული მომავლის ღირსი.
რუსეთისთვის ძალიან მნიშვნელოვანია შეინარჩუნოს საქართველოში ივანიშვილის რეჟიმი. რუსეთ-უკრაინის ომში ივანიშვილის რეჟიმი მნიშვნელოვან როლს ასრულებს. ომის მიმდინარეობის განმავლობაში პუტინი ბევრ რამეში გამოიყენებს ივანიშვილს და ამიტომ პუტინისთვის სასიცოცხლოდ მნიშვნელოვანია ივანიშვილის რეჟიმის არსებობა, დეტალებში არ შევალ. ყველამ ყველაფერი იცის და ყველა ყველაფერს კარგად ხედავს.
– 10 წელი „ნაცმოძრაობის“ ხელისუფლებაში დაბრუნების შიშით აცხოვრა ხალხი ივანიშვილმა. ახლა რუსეთთან ომით აშინებს ხალხს, რადგან „ნაცები დაბრუნდებიან“ აღარ მუშაობს. მართლა ასეთი მშიშარაა ქართველი ხალხი, ამ შიშის გამო, ივანიშვილის ავტოკრატიზმს, ერთი კაცის ხოშს, მის მმართველობას და მისგან გამომდინარე ათას უბედურებას იტანს?
– ეს უკვე სასაცილოა და ესეც ამონარიდია ეფესბე-ს სახელმძღვანელოდან. „მშვიდობა თავისუფლების სანაცვლოდ“ ქართული საზოგადოებისთვის არის მიუღებელი, თუმცა საზოგადოების გარკვეული ნაწილი აყოლილია და იზიარებს მიმდინარე პროცესებისადმი ხელისუფლების ასეთ მიდგომას. მთლიანობაში კი ქართული საზოგადოების დაშინება შეუძლებელია, ჩვენ არ ვართ მშიშარა საზოგადოება. ჩვენი მიზანია საბოლოოდ მოვწყდეთ რუსულ ორბიტას და საბოლოოდ დავუბრუნდეთ ჩვენს ბუნებრივ ნავსაყუდელს, ცივილიზებულ სამყაროს. ჩვენ ვერ დავრჩებით ფარდის მიღმა. ხოლო რაც შეეხება ნაცების ხელისუფლებაში დაბრუნებას, რომლითაც აპელირებს ბიძინა ივანიშვილი და მისი რეჟიმი იმედია ვერ იმუშავებს, რადგან ბიძინა ივანიშვილმა სამხარაძეების, კობახიძეების, მათიკაშვილების, ოხანაშვილების და ძმათა მათთა სახით ნაცები დიდი ხანია ხელისუფლებაში დააბრუნა.
კომენტარები