ანი დვალიშვილი, „ალია“
მიმდინარე კვირაში ახლადარჩეული საკრებულოები შეუდგებიან მუშაობას და შესაბამისად, ხელისუფლებამაც ცვლილებებისთვის მოიცალა. ადგილობრივ დონეზე ბევრი რამ იცვლება, საკრებულოს თავმჯდომარეებიდან დაწყებული, კომისიებისა და ფრაქციების ხელმძღვანელებით გაგრძელებული. რიგ მუნიციპალიტეტებში გადაწყვეტილებები დღემდე არ არის მიღებული და „ალიას“ ინფორმაციით, არ არის გამორიცხული, რამდენიმე პირმა ზედ სხდომის წინ გაიგოს მომავალი თანამდებობის შესახებ.
ადგილობრივი თვითმმართველობის პირველი პირების გარდა, მთავრობა რეგიონის ხელმძღვანელების შეცვლასაც აპირებს. მომავალ კვირაში („ალიას“ ინფორმაციით, ორშაბათს ან ოთხშაბათს), ორი სახელმწიფო რწმუნებულის, გუბერნატორის შეცვლა იგეგმება და ამ ორიდან ერთი დასავლეთ საქართველოდან არის, მეორე – აღმოსავლეთიდან. გუბერნატორების გადაყენების მიზეზი არჩევნებში ნაჩვენები არც თუ სახარბიელო შედეგებია და როგორც ჩვენი წყარო გვეუბნება, თანამდებობას სამეგრელო-ზემო სვანეთის გუბერნატორი გიორგი გუგუჩია და ქვემო ქართლის გბერნატორი, შოთა რეხვიაშვილი დატოვებენ. იმასაც გვეუბნებიან, რომ არცერთი მათგანი უმუშევარი არ დარჩება და ისინი სახელმწიფო უწყებებში დასაქმდებიან, თუმცა შედარებით დაბალ თანამდებობაზე.
კომენტარები