რომელ ვაქცინებს მიიღებს საქართველო, რა ოდენობით და როდის? – პრემიერი და ამირან გამყრელიძე

ივლისის პირველი კვირიდან, პირველი ნახევრიდან დაიწყება შემოსვლა ვაქცინების და ივლისის შუა რიცხვებამდე გვექნება დიდი რაოდენობით სამი დასახელების ვაქცინა, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.

მისივე თქმით, ვაქცინებიდან ორი ჩინური წარმოების იქნება.

ამასთან, გამყრელიძემ აღნიშნა, რომ როგორც ვაქცინაციის არეალი, ისე ვაქცინირებულთა რაოდენობა თანდათან გაიზრდება.

„თანდათან გაფართოვდება ვაქცინაციის არეალი და ვაქცინაციის რიცხვი. გვინდა, რომ ივლისში ყოველდღიურად 20-დან 25 000-მდე აცრა გაკეთდეს“, – განაცხადა გამყრელიძემ.

პრემიერმა კი, დღეს, 25 ივნისს განაცხადა:

“დღეს დანამდვილებით შეგვიძლია ვთქვათ, რომ უახლოეს დღეებში ვაქცინის მილიონ დოზაზე მეტს მივიღებთ, შეგახსენებთ, რომ „ფაიზერთან“ მივაღწიეთ მოლაპარაკებას, მილიონი ვაქცინის მიღებაზე, ასევე ერთი მილიონი „სინოფარმი“, მილიონი „სინოვაკი“ „ნოვოვაქსის“ 700 ათასი დოზა, ჯამში წლის ბოლომდე 4 მილიონ დოზას მივიღებთ, რაც სრულიად საკმარისი იქნება, რათა ჩვენს დაგეგმილ დონეზე, 60 პროცენტი ჩვენი მოსახლეობის იქნას აცრილი“