“უნდა მითხრა, როგორ აპირებ ხელისუფლების შეცვლას არჩევნების გარეშე”– რომან გოცირიძე

პრობლემა ისაა, რომ ოპოზიციური სპექტრის ჩამოყალიბებას ათწლეულები სჭირდება და ახალი სახეები თუ ორგანიზაციები ციდან ვერ ჩამოფრინდებიან-რაც არის, ისაა. სწორედ ამ პოლიტიკური სპექტრით უნდა შევცვალოთ ეს ანტიქართული რეჟიმი, ამიტომ პასუხისმგებლობა მათაც ეკისრებათ.

ლოზუნგი-“ამ ხელისუფლებას არჩევნებით ვერ შეცვლი“ ან „შულერს სათამაშოდ არ უნდა დაუჯდე“-არსებითად ყველაფრის სხვაზე გადაბრალებაა. ამავე დროს, ეს ლოზუნგი ხელისუფლების შეცვლის ერთადერთ გზად რევოლუციას გულისხმობს. თუ ასეა, მაშინ ეს საჯაროდ უნდა ითქვას და შესაბამისი სამოქმედო გეგმაც უნდა ჩამოყალიბდეს.

ხელისუფლების მშვიდობიანი აქციებითა და არაძალადობრივი გზით შეცვლა დანაშაული არ არის. როდესაც ხელისუფლება ისეთ მდგომარეობაში ვარდება, რომ ძველებურად მართვა აღარ შეუძლია, გამოსავალი საბოლოოდ მაინც არჩევნებია, ოღონდ ასეთ შემთხვევაში შედეგი, როგორც წესი, საკმაოდ პროგნოზირებადია და გამარჯვებულიც წინასწარ ცნობილია. ამის ერთ-ერთი საუკეთესო მაგალითია სომხეთში პაშინიანის მოსვლა ხელისუფლებაში.