ქვეყანაში რომ არ ყოფილიყო პოლიტიკური პროცესი, რა თქმა უნდა, შესაძლებელი იქნებოდა და უნდა ყოფილიყო, რომ შეზღუდვები დაგვეწესებინა უფრო ადრე, მაგრამ ქვეყანაში იყო და არის პოლიტიკური პროცესი და ეს პოლიტიკური პროცესი ხდება 4 წელიწადში ერთხელ, – ამის შესახებ საკოორდინაციო საბჭოს სხდომის შემდეგ გამართულ ბრიფინგზე დაავადებათა კონტროლის ცენტრის დირექტორმა, ამირან გამყრელიძემ განაცხადა.
მისივე თქმით, რომ არ ყოფილიყო არჩევნების მე-2 ტური, შეზღუდვები შესაძლოა ნოემბრის დასაწყისში დაწესებულიყო.
„ქვეყანა წავიდა ამ გზით, რომ აქაც დანის პირზე ევლო, ანუ ერთის მხრივ პოლიტიკური პროცესი არ შეეჩერებინა და მეორე მხრივ ინფექციის მართვას. რომ არ ყოფილიყო მე-2 ტური, ეს შეზღუდვები შეიძლება დაწესებულიყო ნოემბრის დასაწყისში და ალბათ მეტ ეფექტს მივიღებდით“, – განაცხადა გამყრელიძემ.
ბატონი ამირანი მართალია, არჩევნები 4 წელიწადში ერთხელ ტარდება, აი, ასეთი პანდემია კი საუკუნეა არ გვახსოვს!
“ალია” შეგახსენებთ, რომ არჩევნებამდე, ბატონი ამირანი ამბობდა, რომ სრულად შესძლებდა არჩევნების დროს რეგულაციების მართვა და პოლიტიკური პროცესების გამო, ადამიანები, მოსახლეობა არ დაზარალდებოდა – თუმცა, ასე არ მოხდა და ახლა ისევ და ისევ სხვას აბრალებს, სხვას რა, სულაც არჩევნებს აბრალებს, იმ არჩევნებს, რომელიც მისი რეკომენდაციებით ჩატარდა, იმ არჩევნებს, რომელზე პასუხისმგებლობაც აიღო…
დაგაძალათ იმ პასუხისმგებლობის აღება, ბატონო ამირან, ვინმემ? პრემიერმა დაგაძალათ? აბა? უთხარით პრემიერს, რომ არჩევნების გამო, ამ შედეგამდე მივიდოდით და არ დაგიჯერათ? არც საწოლფონდის და პერსონალის დამატების ბრძანება გასცა? მოგატყუათ პრემიერმა, ბატონო ამირან, თუ თქვენ მოატყუეთ პრემიერი, თუ რას გვეუბნებთ?
კომენტარები