პოლიტიკური პარტია „გირჩის“ დამფუძნებელი და ყველაზე არაორდინალური პოლიტიკოსი ზურა ჯაფარიძე ორი შვილის მამაა. მისი მეუღლე კი დიპლომატი ნატა ქორიძეა.
როგორ დაიწყო ჯაფარიძეების წყვილის სიყვარულის ისტორია და რამდენად მზრუნველი მამაა ზურაბი (გირჩი) ჯაფარიძე ამის შესახებ მან ჟურნალთან “OK” ისაუბრა. გთავაზობთ ამონარიდს გამოქვეყნებული მასალიდან:
– როგორ გაიცანით ერთმანეთი?
ზურა: ერთმანეთი დიდი ხნის წინ საერთო მეგობართან გავიცანით. ნატა მაშინ „ჯიპაში“ სწავლობდა.
ნატა: ჯგუფელები ერთად ვმეცადინეობდით და ზურა მაშინ მოვიდა.
– რით მოგხიბლათ ერთმანეთმა?
ზურა: პირველი შთაბეჭდილება ნატაზე? ძალიან ბეჯითი და მონდომებული გოგონა იყო. მოწესრიგებული და პედანტი. თავისთავად გარეგნობამაც გავლენა იქონია.
ნატა: სიმართლე გითხრათ, პირველად რომ ვნახე, განსაკუთრებული შთაბეჭდილება არ დამრჩენია, რადგან მეცადინეობაში ვიყავი ჩაფლული. სიმპათიები მეორედ შეხვედრის დროს გაჩნდა.
– როგორ დაიწყო თქვენი სიყვარულის ისტორია?
ზურა: გაცნობის შემდეგ ჩვენს ურთიერთობაში რამდენიმეწლიანი წყვეტა იყო.
შემდეგ ისევ შევხვდით ერთმანეთს, უკვე 2012 წელს, სხვათა შორის ისევ იმავე მეგობართან. შემდეგ საერთო მეგობრებთან ერთად დავგეგმეთ სამცხე-ჯავახეთში მოგზაურობა, თუმცა, ბოლოს ისე მოხდა, რომ მხოლოდ მე და ნატა წავედით. ასე დაიწყო ყველაფერი.
– გაგვაცანით თქვენი შვილები.
ნატა: უფროსი ბიჭი ალექსანდრე გვყავს. მეორე შვილი კი შვილი კატოა .
ზურა: რომელიც ძალიან, ძალიან აქტიურია და ჯერჯერობით მხოლოდ რაიმეს გაფუჭებით არის დაკავებული.
– როგორია თქვენი ოჯახის ერთი ჩვეულებრივი დღე?
ზურა: ჩვენი დილა 07:00 საათზე იწყება. ალექსანდრე ადრე დგება, შემდეგ კატო იღვიძებს და უფროსები სამსახურში მივდივართ.
ნატა: სამსახურიდან შინ 19:00 საათზე ვბრუნდები ხოლმე და დღის დასასრულს, როგორც წესი, ზურას ტელევიზორში ვუყურებ.
კომენტარები