ლევან ჯავახიშვილი
„ალიას“ესაუბრება ეკონომიკის დოქტორი, პროფესორი, ოთო აბესაძე.
– თბილისში ბინების ქირის გაძვირების გამო, რეგიონში მცხოვრები სტუდენტები ბინებს ვეღარ ქირაობენ. სწავლა დაიწყო და ასეულობით სტუდენტი ამის გამო ვერ ჩამოდის თბილისში და ვერ სწავლობს… რა ეშველება ამ პრობლემას?
– გავიგე, მაგრამ ვერავის ვერ დაავალდებულებ, რომ ბინა ვიღაცას იაფად მიაქირაოს, თუნდაც ხელმოკლე სტუდენტს. სამწუხარო რეალობაა, რომ საქართველოში და მეტწილად თბილისში, ბევრმა გადაწყვიტა, რომ საკუთარი ბინა მიექირავებინა ოკუპანტი ქვეყნის წარმომადგენლებისთვის. თუმცა, ეს მათი უფლებაა, მათი კერძო საკუთრებაა და ვისაც უნდა მიაქირავებენ, საწინააღმდეგოს ვერავინ დაავალდებულებს. ახლა სწორედ ის დროა, უნივერსიტეტებმა დაიწყონ საერთო საცხოვრებლების აშენება თუ მოწყობა. თბილისში საერთო საცხოვრებლები ცოტაა და რაც მეტი იქნება, მით უფრო უკეთესი იქნება ყველასთვის. ძალიან ბევრი უნივერსიტეტია და თუ ყველას საკუთარი საერთო საცხოვრებელი ექნება, ძალიან კარგი იქნება. თუ უმაღლესი განათლების ევროპულ და ამერიკულ მოდელს მივყვებით, სადაც ყველა უნივერსიტეტს თავისი კამპუსი აქვს.
– აქამდე რომ ეფიქრათ ამაზე ჩვენი უნივერსიტეტების, განათლების სფეროს მესვეურებს, უკეთესი არ იქნებოდა?
– აქამდე მაგაზე ბევრს უფიქრია, მაგრამ ადრე ბინების ფასი დაბალი იყო, კონკურენციას უწევდა კერძო ნაქირავები ბინები საერთო საცხოვრებლებს. ახლა, შესაძლოა, ბევრად იაფი გამოდიოდეს საერთო საცხოვრებლები, მაგრამ არავინ იცის, რა იქნება გაისად. ეს არ არის მომგებიანი ბიზნესი, საერთო საცხოვრებლები სოციალური პროექტია. ამიტომ შეიკავეს აქამდე თავი მისი განხორციელებისგან უნივერსიტეტების უმრავლესობამ.
კომენტარები