ბათუმის მერვე საჯარო სკოლამ აჭარის მთავრობის ყოფილი თავმჯდომარის, თორნიკე რიჟვაძის შვილებს მოსწავლის სტატუსი განუსაზღვრელი ვადით შეუჩერა – ინფორმაციას ადგილობრივი გამოცემა აჭარა თაიმსი ავრცელებს.
სკოლის დირექტორის, ქეთევან გვარჯალაძის განმარტებით, გადაწყვეტილება მოსწავლეების დედის, მაგდა მამულაძის წერილობითი განცხადების საფუძველზე მიიღეს.
“ამ ეტაპზე ბავშვებს სტატუსი შეჩერებული აქვთ, თუმცა დოკუმენტაცია სკოლიდან არ გაუტანიათ. მოქმედი წესის მიხედვით, თუ მოსწავლე გარკვეული დროის განმავლობაში არ დადის სკოლაში, მშობლის განცხადების საფუძველზე შესაძლებელია სტატუსის შეჩერება. განცხადება ერთ-ერთმა მშობელმა გადმოაგზავნა. დაბრუნების შემთხვევაში, მათ იმავე კლასში აღუდგებათ სტატუსი. განცხადებაში არ ყოფილა განმარტებული სტატუსის შეჩერების მიზეზი“ – განუცხადა აჭარა თაიმსს გვარჯალაძემ.
გამოცემამ რამდენიმე თვის წინ გაავრცელა ინფორმაცია, რომ თორნიკე რიჟვაძე მშობლებთან, მეუღლესთან და შვილებთან ერთად გერმანიაში გადავიდა საცხოვრებლად.
კომენტარები