პარლამენტის ბიუროს სხდომაზე, სადაც რამდენიმე ოპოზიციურმა დეპუტატმა მიხეილ სააკაშვილის სასამართლო პროცესზე დასწრების აუცილებლობაზე ისაუბრა და ხელისუფლება მსჯავრდებული ექსპრეზიდენტის უფლებების დარღვევაში დაადანაშაულა, მიხეილ სარჯველაძემ კოლეგებს მსოფლიო პრაქტიკა გაახსენა.
„რიტორიკულად ვსვამ ამ კითხვას: მიღებულია თუ არა სასამართლო სხდომების დისტანციურად, პატიმრების დისტანციური ჩართულობით გამართვა?! არის ეს მისაღები თუ არა?! მხოლოდ საქართველოშია ასეთი პრაქტიკა, თუ არის საზღვარგარეთაც, ყველა ქვეყანაში, მათ შორის, პანდემიით განპირობებული მოტივებით?! ასეთი პრაქტიკა არსებობს!“, – განაცხადა მიხეილ სარჯველაძემ.
დღეს თბილისის საქალაქო სასამართლოში დღეს მიხეილ სააკაშვილის საქმის არსებითი განხილვა გაიმართა. საქმე ეხება დიდი ოდენობით საბიუჯეტო თანხების ჯგუფურად გაფლანგვის ეპიზოდს. ექსპრეზიდენტთან ერთად, ბრალდებულია სახელმწიფო დაცვის ყოფილი უფროსი თემურ ჯანაშიაც.
საბიუჯეტო თანხების გაფლანგვის საქმის პროკურორი, გიორგი მუჯირი აცხადებს, რომ სასამართლო სხდომაში ბრალდებულ მიხეილ სააკაშვილის ჩართვის ორი ალტერნატივა არსებობდა, თუმცა, გურკვეველი მიზეზით, დაცვის მხარემ, ორივეზე უარი თქვა. მისი თქმით, შესაძლებელი იყო, ადგილზე მისვლით გამართულიყო სასამართლო სხდომა ან ბრალდებული წარდგენილი ყოფილიყო სასამართლო დარბაზში დისტანციურად, ტექნიკური საშუალებების გამოყენებით.
კომენტარები