პრემიერ-მინისტრმა ირაკლი ღარიბაშვილმა, მთავრობის სხდომაზე განაცხადა:
„იგეგმება მასშტაბური პროექტი, რომელიც გულისხმობს 800 სკოლის მშენებლობა-რეაბილიტაციას. პროექტის საორიენტაციო ღირებულება დაახლოებით 1 მილიარდ ლარს შეადგენს.
სექტემბერ-ოქტომბერში გამოცხადდება ტენდერი 80 ახალ სკოლაზე და 320 სკოლის რეაბილიტაციაზე.
დანარჩენი 400 სკოლის რეაბილიტაციის ტენდერები გამოცხადდება 2023-2024 წლებში.
ჯამში, 800 სკოლის მშენებლობა-რეაბილიტაცია დასრულდება 2026 წლამდე. 2024 წლამდე გვინდა, რომ 400 სკოლის მშენებლობა-რეაბილიტაცია მოვასწროთ. ეს არის ჩვენი გეგმა.
ახლა ვამუშავებთ ბაღების ანალოგიურ პროექტს.
ძალიან ბევრ მუნიციპალიტეტსა და სოფელში ბაღები სავალალო მდგომარეობაშია. სკოლების გარდა აუცილებელია, რომ საბავშვო ბაღებიც იყოს გამართული, ევროპული სტანდარტის. ისე, რომ ღირსეულ პირობებში იზრდებოდნენ ჩვენი შვილები.”
საქართველოში სულ 2085 საჯარო სკოლაა და მიუხედავად იმისა, რომ ყოველ წელს გვესმის, რომ სკოლები რემონტდება, ან დანგრეული სკოლის ნაცვლად ახალი ააგეს, როგორც ჩანს, სკოლების თითქმის ნახევარი სავალალო მდგომარეობაშია და ჯერ კიდევ არ არის იმ მდგომარეობაში, რომ შეგვეძლოს ვთქვათ: “ჩვენი შვილები ღირსეულ პირობებში იზრდებიან”. იგივე მდგომარეობაა, თუ უარესი არა, საბავშვო ბაღებში.
კომენტარები